Konkani Kovita: GOENCHO UGDDAS

GOENCHO UGDDAS
(Memories of Goa)

Poem in Konkani
by Tony Fernandes

Celebrating World Goa Day - 20 August 2009


Ugddas burgeaponnailo maka sodanch eta,
Jednam xinkunk ami vetaleum Escola Primaria,
Barabor chollon ami voiltaleum,
Daktule uzar kelele cherache batlen
Slate pussunk irlexem udok ami vortaleum.

Primeir, segund, tercer, kaddun talle
Ladainh cantad ami kortale;
Salve kabar zalea uprant
Kotten vath pettoun
Xamainchea atik dhorun
ghara ami vetale.

Ugddas maka sodanch eta
Novea Vorsacho
ani Natalanche ratricho;
Modianichem miss zalea uprant
Vaddentelea lokak uttoitale
Zage ravon amchea daktulea vaddeant
Cantaram korun rath sartale.

Boas Festas do Natal, Feliz Novo Ano,
Deu Boro Dis Dhium, Deu Bori Rath Dhium,
Kai borim him vinchun kaddleleam utranim
Sogleank ami vodkitale.

Gaunchea Festachi feri
Pollounk disso chodd bori
Khuxealkaien lok kori festachi toeiari,
Fath-gravat bandunk urba amkam etali
Ani Corar ravon amim Miss Cantad kori.

Ugddas maka sodanch eta
Siole taricho ani Ponjecheam ferri-bottincho
Taxi and caminhao-vancho
Vollok korunk ek zantti maka vinchari
Baba tum khuincho?
Tor gorib aum zaun khoro
Fokannanim zabab ditalom
Ek batkar munn aum Guirvodcho.

Visronk ekdom kottin Mapxencho bazar
Kiteak khuinchoruch naslo eka tempar
Itlo voddlo mercad,
Kherit bazaracho dis aslo ek Sunkrar
Meutaleo vostu thuim zinsanvar
Punn atam tor teka poloixi zalear
Zaleat tache Bara Berestar
ani Tera Sunkrar.

Ugddass adle korun,
Boroun boroth xembor paginam;
Sogleam Goenkarank
Pordesan and Goeam
'Khuxealborit World Goa Day'
Aum aundetam.


Tony Fernandes
www.tonferns.blogspot.com