Sunday, February 21, 2010

Pordesant Konknnichi Seva

Febrerache 20 & 21ver 2010, Curchorem Ravindra Bhavan sobhaghoran, Dalgado Konknni Akademi (DKA) ghoddoun haddlolem dusrem, Konknni Romi Lipi Sahitya & Sonskruti Sommelon somoyar ek Yadostik (souvenir) uzvaddak haddlo. Hea yadostikacher Pordesant Konknnichi Seva Goa-World.com Team-icho lekhok ani kovi Lino B. Dourado, hancho; ek voznadik lekh chhapun aila to, hangasor pordesantle Goykarank odik korun Kuveitche-Goykarank vachpa khatir ami ditat.

Mogan,
Gaspar Almeida
Goa-world.com moderator
22/02/2010


Pordesant Konknnichi Seva

Khoinchea-i zatiche Gõykar te zaum, pordesan vetana aplea bhorim osmitay, sonvnskrutay ani Gõychi poromporik kola vorunk mat visro nant. Gõykar khoinsoruch te vosum, apli sonvskrutay samballchea khatir te poilea suvater, dusrea Gõykaranchi ixttagott zhoddun ek lhanxi sonstha ghoddun haddtole. Zo Gõykar apli bhaxea bore toren somzota to Gõykar aple sonvskrutichem mothv zanno asta. Ani dekhunuch, Kuveitt osle lhan desant Gõykaramni lhan toxeo vhodd sonstha ghoddun haddleat ani aple avoy bhaxechi veg-veglea panvdeacher ravun, seva kortat. Adim tem atam meren Kuveittant vosti kortoleam Konknni mogi bhav-bhoinnamni Konknni bhaxek pavla konnkonni nett ani tenko dila ani di’it asat. Konknni bhaxek kaidean manache uncha sodrer bosunchea vellar Kuveittanle Gõykaramni Konknni sovem kherit mog ani husko dakhoilo to mat konnachean visrunk zaina. Dor ek Gõykar aple avoy bhaxecho mog-apurbay, pordesan prokasunk fattim ravonant. Kuveittche desan Konnnnicheo sabar sonstha, sonvskrutik kariavolleo, Konknni khariakrom, tiatr, Konknni Ek Ankhi Nattkulim Spordha, adi, adi machier haddun Kuveittan Konknni bhas jivi dovortat. Kaim sonsthani Konknniche seva khatir omor ugddasache teag keleat ani kortat te, tumche somor dovorpak mhaka khub anond bhogtta.

Arab Saibinninchim Ballkam: Kuveittantli ‘Holy Family Cathedral Church’ Arab Saibinink bhettoilea ani hatunt dor Aitara sanjechea 3.30 ani 4.30 voranchim Misam Konknnileant zatat. ‘Arab Saibinninchim Ballkam’, ho ekuch Gõycho Konknni gayon monddol. Sanjechea 3.30 voranchea Misant vantto ghetoleank, tanchim suvadik Konknnilean bhoktti gitam aikun Gõyant aslea vorim dista. Dor vorsa May mhoineant ‘Konknni Choir Day’ vhodda dobajean sorombhtat. ASB-cho gayon monddol, 28 vorsancho zala. Hatunt Gõychea sabar ganvchea bhav-bhoinnancho aspav asa, ani sodeak monddolacho mukheli Lazarus Menezes zaun asa.

Kuwait Konknni Kendr Kandoleche A. Veronica Fernandes, hanchea fuddariponnan 1984 vorsa ‘Kuwait Konknni Kendr’ ghoddun haddlo. Pordesant Konknni bhaxechi zagrutay ani Gõychi sonvskrutay jivi dovorpak kendracho mukhel hetu zaun asa. Sonvskrutik kariavolleo, tiatr, poilech pavtti Manddo Utsov Kuveittan keleat. Sorgest Fr. Antonio Pereira hanchea ‘Konknni Voparinchem Bhanddar’ pustokak, 10 hozar rupieanchi mozot khelea ani Konknni mullavem xikxonnanchi pustokam chappun haddpak 25 horanchem dan ‘Thomas Stephens Konknni Kendr’-ak dileat. Konknni pasot KKK-chem vhodd yogdan mhonllear Konknnileant Novem Goem disallem uzvadda haddpak Kuveittchea Konknni mogieanchea adharan ‘Novem Goem Pratishtan Kuwait Somiti’ ghoddun, sumar 5 lak rupianchi ten’nachea Novem Goem Pratishtan-ank mozot dil’li asa.

United Club of Utorda-Kuwait Kuveittant nokri korche korun thoddeamni lipun asloli kola machier dakovpachi umed dakhoili ten’na ‘UCU-Kuwait’ fuddem sorun novea borovpeank, digdorspeank, kolakarank ut’tejon divnk ‘Konknni Ek Ankhi Nattkutlim Spordha’ 2002 vorsa savn suru korun Kuveittant Konknni mollar ek itihas rochlo. Khub zonnani segid spordhen bhag ghevn aple artichi kopxi dakhoili ani tatuntle thodde aiz Gõyam vhodd kollakar koxe machier porzotat ani te zaun asat Simon Gonsalves-Chalis Dis ani Chalis Rati famad dhormik tiatracho digdorspi (Poilech pavtti Kuveittchea itihasan tacho to tiatr korezmachea disamni UCU-Kuwait hasrea khal machier haddlolo) ani dusro Ignatius de Xelvonn.

Kuwait-Goa Tiatristanchi Sonstha: Utodd’decho tiatrist Marcus Vaz-achea mukhelponnan 2002 vorsa KGTS sthapli. Kuveittant rabito korun aslole nanv voste tiatrist he sonstheche vangddi asat ani dor vorsa ‘Konknni Songit Sanj’ kariokram machier haddun Koknnileant bori kormonunk Konknni tiatr pollenarank divn Konnnichi seva kortat. Teach porim sahit’yechem mothv zanom aslole KGT-Sonsthen Abril 2007 vorsa Goem Kalapurche lekhok Shri Brazinho Soares, hanchem ‘Opareancho Jhelo’, Kuveittche Holy Family Igorjiche Vigar Rev. Fr. Melvin D’Cunha-chea hatantleant vimorson kelam ani Brazinho-babacho bhovman kela.

Kala Mogui-Kuwait: Konknnichi seva korcheli tachea rogtantuch asa. “Ze sagear Konknni asa thoim hanv hajir asam” , oxem KMK-cho odheox Xri Domingo Araujo mhonnta. 2000 vorsan, kaim borea deknnareank ulo marun KMK sonstha ghoddun Konknnichi seva khatir panvl ukhol’lolem tem aiz meren xantikayecho, ekvottacho marg dor ek Gõykaran koxe toren apnavpak zai tem bes toren hi sonstha veglozar visrun, sogott Kuveittche Gõykarank mogachea pinzrean dovorchem tancho mukhel vavr. Gõychem poilem rongit masik ‘Gulab’ bond poddpache poristithir pavlolem, tea vellar khub zonnank dukhlem. KMK odheoxan, fuddarponn ghevn kosoi tori 25 vorsancho zal’lo Gulab morun divncho nhoi mhunn KMK hasrea khal 25 Konknni mogeanchi ek ‘Gulab Working Committee’ ghoddun, vorixtt Konknnilean kariokram machier haddun Gulab masikacheo pakotte bhavun votaleo teo porot jiveo dovorleo ani Gulab dor mhoineank vachpeanchea hatant poddtta toxem kelem.

Goa-World.com: Aichea electronic media-k lagun sonvsarachea eka konxeachi khobor dusrea konxeak sekenda bhitor internet-a velean pavtti zata, ani hatunt Gõykar unnem nant mhunn Kuveittan borech tempavele vosti korun aslole Ulysses Menezes (Bastora) ani Gaspar Almeida (Parra) 1994 vorsa savn, Goa-world.com hem mavlle tholl suru kelam. Hem ekuch mavlle thollan, Romi lipi borovpeank 40 tok’ke zago bhettoila, ani dekhunuch vorixtt namneche Konknni lekhok, kovi hanchi borpavoll hea mavlle thollar vachunk melltolean, Goa-world.com disan dis sonvsarak ximpoddlolea Goykaram modim prosidh zata. Ulysses Menezes ani Gaspar Almeida hanchi ani ek onek toren Konknnichi seva mhonlear tannim poilem ontoraxtrik internet Kokani Music Station online rochlam.

Anikui sonstha asat teo, Konknni khatir pordd’dea fattlean ravun khubxi Konknnichi seva kortat. Konknni khatir dusro kitlo meren vavurta ani lagim asa tem monneponnan polletat ani tachi thoknnai ani bhovman korpak fuddem sortat ani tatuntli ek sonstha zaun asa ‘Goan Cultural Center-Kuwait’. Ho lekh borovpean, ‘Goa-world.com’, hea mavlle thollar 101 kovita uzvaddak haddlolean, GCC-Kuwait hannim, Crown Plaza hea 5 nokhetri hotelant Kuveittche Indian Embassy-ntlea First Secretary for Education and Information Mr. V. K. Mahajan, hanchea hatantlean sotkar kela. Oi! Hench zaun asa Kuveitt-Gõykaranchem Konknni bhaxe sovem vhoddponn ani motteponn.

Ani nimnnem mhonlear, Verneche T-Bush-n ‘BLACK – Nhesop Atanchem Fashion’ poilem Konkani E-cinema toyar korun ani vhodd sinemachea podd’dear dakhoun bhagarachea okxoran apnnalem nanv boroun, pordesan Konknnicho itihas rochlo


Lino B. Dourado
http://aitaracheokaskuleo.blogspot.com/

No comments: