Devak Bhiyet to Monxam modem jiyet

Voparinchea Bhanddarantlem:

Devak Bhiyet to Monxam modem jiyet

Aiz Devak konn bhiyeta? Aiz Devak konn man dita? Monis monisponn visorla. Devak okman, hem monis aiz visorla. Monis hea sonvsarak bhul’la, tacho gulam’ zala. Aiz duddvank, manak, podvek, vhoddponnak, gorvak to aple Dev manunk lagla. Khorea, niz rochtolea Devachem mon’xak poddun vochunkuch na. Magnnem kortolo, Devachem utor vachtolo sonvskaran vantto ghetolo, dekhivont jivit jiyetolo, hem taka poddlolench na. Mon’xacho xevott churchureancho zait, hem niyal’learuch amcher akant sutt’ta.
Aiz monis duddvank bhul’la. Panch lakh asat te dha lakh kednam zatole, oslinch sopnam, disachinch sopneta. Ani apli zodd vaddounk kitem-i korunk ho toyar. Taka chorunk nagounk, khunn korunk poddlear porian to bhiyena. Punn taka fokot duddu zai duddu! Adim monis gorib aslo, jevnnak porian patixer zatalo. Punn atam tache lagim duddu aileat, to girest zala. Duddu na tednam tache lagim monisponn aslem. Mon’xam sovem to mon’xall, mogall ani doyall aslo. Punn atam duddvamni tachea monisponnacher sai haddlea. Monis mon’xakuch monisponnan lekhina. To sogllem duddvamnich mezta. Soglleanchem duddvamnich mol korta. Duddu mhollear taka sogott zalam. Duddvamni to sonvsar vikto ghevnk sodta. Devak favo aslolo man mon’xan duddvank dila. Duddu tacho Dev zala. Hem kednam porian choltolem? Ek pidda ailear, tika ilaz divnk tuje duddu tuka pavchenant, Devuch tuka pavtolo. Kitlei tuje lagim duddu aslear porian, favo to tacho upyog kor, duddu tuje tokler bosunk dium naka, na zalear te tuka tokler bosunk dium naka, na zalear te tuka pixe korun soddtole. Sogllea vellar duddvanchench chintche bodlek Devachea mogachem-i kednam-i chint ani tujea duddvancho boro upyog kor. “Jem tuvem lhanantlea lhanak kelem, tem tuvem mhakach kelem,” oxem Jezun mhonnlam. Zata zalear gorjevontank, konn nasloleank tujea duddvamni adar di.
Monis aiz man-podvek, vhoddponnak lobdola. Man-podvi to apleak zai toxi to vapurta. Aplea khala asloleak kikont korta. Zati-katicho vegllochar mandta. Aplem nanv porgott kortat thoim kitlem-i ‘donation’ divnk to toyar. Man khala ghalun bhonvunk aiz konnak naka. Soglle tokli voir kaddun bhonvunk sodtat. Zaite pavtt fatrak apttun xevttotat. Punn hem tankam poddlolem na. Monis unchlea panvddear cholta, kiteak taka zai soglleamni taka salam kelolo, soglleamni taka chepem kaddlolem. Apunn ek dis gorib aslolo, hem aicho podvedar visorla. Ani visorla dekhunuch to goribank kikont korun jiyeta. Tanche hok’k mostita. Sodanch podvi choloitolea bhaxen aicho monis monisponn visrun jiyeta sonvsarant taka mozuri mellot, punn Deva sorxim sorgar taka kitem-i tori mellchem asa?
Aiz mon’xachea jivitant gorv bhitor sorlam. Monis apleo osoktayo aiz mandun ghena. Apnna von dusro odik chukta oxem to somzota. Chuki korun porian horddem voir kaddun bhonvta, xat’ti fuloit asa. Jednam monis apunn osokt, tallnneacho gulam’, vaitt sonvoyancho pottlo, patkancho bhageli mhonn mandun ghena, taka son’dan sonvskarachi goroz disona. Ani zo Deva kodde antrea-poirean bhogsonnem magona, taka aplea khas jivitant bhogsonnem divnk-ghevnk avgodd zata. Mon’xachem gorv aiz vaddot asa. Jem kitem aiz mon’xa lagim asa tem apnnak Devan dilam ani Devachean tem apnnak zai tednam vhorum ieta, hem aicho monis visorla. Tachea gorvan tachea dolleancher sai haddlea. Gorvixtt monis Devak-ui manovna, mon’xank-ui avoddna. Fokot tachem jivit takach borem dista. Mon’xachem gorv mon’xak khala apttita, xevott churchureancho korta.
Apnna sarko ani dusro konn na mhonn monis somzota tednam, to apleach hatamni aploch fondd ustita. Gorvak ani Devak poddona. Lhanvikak Dev voir kaddta ani gorvixttank khala apttita.
Krist Joyonti porob umbrearuch asa. Amchea jivitacher nodor marun, son’dan sonvskara vorvim amchem kalliz-mon nitoll korun Jezuk amchea jivitant zolm’ divnk Povitr Sobha amche thaim magta. Aiz hanv duddvancho gulam’ zavn jiyetam? Girestkayeche punjer bosun niz rochtolea Devak visorlam? Aiz hanv hea sonvsarantli man-podvi zoddunk axelam? Vhoddponn fattleanuch dhanvtam? Man-podvi-vhoddponn mhaka sorgar pavouchem na punn sonvsarantuch ghuspaun uddoitolem hi tuka khobor asa? Devan tuka zaitea denneamni bhorla, tum gorvan bhonvunk nhoi punn khaltikayen tacho vapur korunk hem tum zanna? He ogunn tujem ozun porian jivit choloytat zalear hea Krist Joyonti somoyar kallzant yetolo-so tuka dista? Tuka hea tujea ogunnachi porva na, ani hanche khatir Deva lagim bhogsonnem magunk tum toyar na zalear, tujea jivitant tuka khoxalkay melltoli? Thoddoch kall togta tosli khoxalkai puro taka? Jezun haddloli xanti, khoxalkai, sontos naka tuka? Devak bhiye, tache updes samball, mon’xam modem mogan jiye, ani hea vorsak tujim Natalam orthabhorit zatolim. Tumkam soglleank ek khoxalbhorit ani anondbhorit Krist Joyonti Porob anvddetam.

Nevel Vell’lekar