Goencheo Khobro

Bainguinichea proxnak lagun lokacho morcha
Ponnje: Pornnea Gõyant Bainguinim vattarant sorkar kochreak zago dita mhonn virodh korun lokan Fevrerache 3rer Vidhan Sobhe mukhar morcha vhorpache vatter astana Mandovi Pula lagim tankam pulisen addailim. Maharaxttra Gomantak Pokxacho amdar Deepak Dhavlikaran Mukhel Montri Xri Digambar Kamatak khor xiddkavnni dili ani zor to Bainguinim kochreacho prokolp ghalpachi ievzonn fuddem vhorot zalear tachea pokxacho fuddar koslo zatolo tem polle mhonn sanglem. MG Pokx-an dil’lo tenko fattim kaddtole mhonn dhomki dili. Santa Cruzachi Amdar Xmt. Victoria Fernandes, amdar Pandurang Madkaikar hancho-i morchant aspav aslo. Pri. Maverick Fernandes, Diosezan Somajik Niti ani Xantichea khateacho chittnnis ani Pri. Conceicao D’Silva hajir asle. Lokak vaitt zata tem nivarche svater Mukhel Montri apli kodel samballunk vavurta mhonn sangun Madkaikaran tachi koddok tik’ka keli. Ji zomin kochreachem prokolp ghalunk ghetlea ti portun dhoniak diunchi mhonn lokachem magnni asa, oxem Xri Madkaikaran sanglem. Sumar 3 hozar lokan tea disa morchant vantto gheun Ponnje gelo ani nixedh marlo. Poilo lok ‘inter-state’ bosi mandar ekttaim zaun chalu aslole Vidhan Sobhechea Komplexant vochunk sodtalo, punn pulisen tankam addaile. Bainguinim kochro ghalunk diunchona mhonn Xri Digambar Kamatan lokak kitlech pavtti asvasonam dileant astana to dil’lea utrak thir ravona. Haka lagun tachea sorkaracher aplo visvas bigoddla mhonn zaitea ulovpeamni sanglem. Atam tori sorkar Bainguinim kochro ghalpachem soddun usro zago ghetolo mhonn somzotat, ani oxem kelearuch lok xant zatolo ani lokacho sorkarcher visvas bostolo mhunn ulovpeamni sanglem.

Konknnicheo lipyeo kuxin dovrun ekvott samballunk ulo
Ponnje: Konknnivaleamni bhaxecheo lipiancho vegllochar kuxin dovorcho ani Gõykarancho ekvott ani osmitai ani sonvskrutai samballchi mhonn adlo Udyog Montri Luizinho Faleiron ulo marlo. Fevrerache 4ter Menezes Braganza Sobhaghorant Xri Faleiro Rajbhas Disa nimitan uloilo. Mizoram rajyachi dekh tannem dakoili, thoim koxe porim bhaxe vorvim sogllo ekvottun asat tem tannem iskutailem. Gõyantuch bhaxechea proxnak lagun loka modem futti poddtat mhonnlem. Gõychi osmitai ani sonvskrutai samballat mhonn ulo marlo. Apunn Udyog montri astana udyogamni nokreo sodtoleamni poilem Konknni bhas zanno zaunk zai mhonn kaido kel’lo tacho tannem ugddas kelo. Konknnik odhikrut bhaxecho dorzo mell’lear 22 vorsam zalim, punn azun-ui kainch zaunk na mhonn tannem sanglem.

Kalanguttcho amdar inglez iskolank onudan magta
Kalangutt: Inglez madheomachea iskolank sorkaran onudhan diunchem mhonn Kalanguttchea Amdar Agnelo Fernandesan nettachi magnni kelea. Rajpalachea bhaxonak dhin’vaspi prostav haddlo tednam Xri Fernandes uloitalo. Halinchea kallar chodd lok aplea bhurgeank Inglez iskolamni dhaddta ani jea lokak toslea iskolamni dhaddunk kuvet na to lok aplea bhurgeank sorkari onudhan melltolea iskolamni dhaddtat mhonn tannem sanglem. Sorkari mullavea iskolamni xiktolea bhurgeank Inglez madheomachea iskolamni vetat tednam borech tras poddtat ani tankam inglezintlean ek voll borounk zaina mhonn amdar Agnel Fernandesan sanglem.

Adhivaxi Kaido 2002 chalik launk magtat
Tisvaddi: Gõyant Adhivaxi Kaido 2002 - Tribal Act 2002 kaido chalik lavcho mhonn Tisvaddintlea Adhivaxi Kolyan Songhottnechea odheokx Narayan Kunkolkaran toxench Santa Cruz, Kumbarzuem, St. Andre, Taliganv, hangachea adhivaxi songhottnnanchea odheokxamni sorkarak magnni kelea. 2002 vorsa Adhivaxi Kaido Sonsoden pas kel’lo ani sogllea rajyamni chalik lailolo, fokot Gõyantuch to chalik lainastana azun fattim dovorlolo. Gõyche Vidhan Sobhent 12.5% rakhiv zage ani kuxin adhivaxi komisanv sthapunk Santa Cruzchea Dattaram Balekaran maglem.

Bekaidean zomnichem rupantor korop vaddta
Mhapxem: Bardez talukentlea zaitea ganvamni bekaidean zomnichem rupantor korpacho vavr nettan cholta, torui astana kaim sorkari agensi aple dolle dhampun ravtat. Kaim lok xetanchea zomnicher mati ghalun purounk lagleat punn odhikari koslench panvl ubarinant . Mhapxeam legun lok xetamni mati ghalun purovpachem kam’ nettan kortat mhonn sangtat

Casinok bekaideacheo porvangeo?
Ponnje: Gõyche nodint Casino botti cholovpak porvangi diupant chukichim kamam keleant tim Virodhi Pokaxacho Fuddari Manohar Parrikaran Vidhan Sobhent ugtim kelim. Casino vixim zaiteo chuki zatat punn sorkar kainch porva korina ani tanche add koslich karvai korina mhonn Manohar Parrikaran tik’ka kelea.

2021 Prantik Plan-a khatir anik kall magtat
Ponnje: Save Goa Songhottnnecho fuddari Antonio Gauncaran mukhel Montri Xri Digambar Kamatak magnni kelea ani 2021 Prantik Planak maneotai diunche adim lokan tacher anik-ui obheas korpak kall diuncho mhonnlam. Ho plan vhevharant ghalche poilim lokan to sarko pollelear borem, kiteak ek pavtt chalik lagtoch magir virodh kelear kamam bond poddtat.

Panchayat Raj Kaideant bodlopachi suchovnni
Ponnje: He chalu Vidhan Sobhent Panchayati Raj Kaideant bodlop korun 244B vibhaga uprant 244C hem novo vibhag zoddunk Vidhan Sobhek suchoilam. Toxench Sarpanchan bhouxik kama khatir ek hozar rupia asle te 5 hozar rupia vaddoupak suchounni kelea. Panchayat Raj Montri Manohar Azgaonkaran Gõy Panchayat Raj (durusti) bil Vidhan Sobhent manddlem.

Valkinichea Kapelachi porob
Sanguem: Halinch Sanguem firgojentlea Valkini Kapelant Saibinnichi porob somarombhli. Porbechea Misacho Mukhel Iadnik Pri. Caitano D’Costa aslo, Fr. Agnel Songit iskolacho direktor Pri. Nixon D’Silvan Misant vantto ghetlo. Saibinn Maiche mozotin Dev lokak gorzo xat’ti pavoita mhonn Pri. Costan sermanv kortana sanglem. Sanje Agostinho D’Costacho Konknni tiatr Chintunk Nam machier haddlo.


http://www.v-ixtt.com/goencheoherkhobro.html