Ek Lhan Istor: POILO E-BHIKARI ?

Ek Lhan Istor: POILO E-BHIKARI ?



[Ek assa Aurajo Kalapurkar
Dusro assa Dourado Uttordekar
Ani tisro assa Almeida Parrikar]


Dezembrachi tin tarik, Goemchea Saibache porbecho disa. Kalapurkar ferent bhik magta, Uttordekar suit boot ghalun festachem nigtench vodlem mis sompoun tonddant chonne chabbot Kalapurkar ubbo assa thoim pavta.


Kalapukar: Baba Saibachea navant kitem ghall re baba (zorui uttordekaran chodd pornea modelacho fath ghatlolo torui tacher chodoilolo cheracho vass sangtalo to Kuveittkar mhunn)

Uttordekar: Are tum international bikari kitem?

Kalapukar: Tem amchem profession, tumche bhaxen nhoi, Goem pavle Aitaracheo Katkutleo bond, Korezm ailem Aitaracheo Katkutleo bond, konn suttient gelo e-Newsletter bond (Uttordekar bolsam sospota)...

Uttordekar: No change

Kalapukar: Kitle zai?

Uttordekar: Tum mhaka loz kortai, tum zanai hanv konn to? Lino B. Dourado, chodd korxi zalear hanv tukam katkutleo kortolom, chuk zali hanv tujer katkutleo boroitolom, suit boot ghatlolea mhunnxeak hea porim vagop sarkem nhoi tujem!


Kalapukar: Suit boot? tum kitem somzota fokot tujeach lagim suit boot assa mhunn, ami kolakar amchi mustaiki ami gheunuch bhonvta (bag ugodtta ani Uttordekar-ache poros borea modelachem suit ani bhangarachi deg aslole moche ghalun donuch minutan dusre bhumikek toiar zata). Atam sang kitleachi mod zai?

Uttordekar: Mhojea lagim Indian currency nam, foreign currency assa.

Kalapukar: Abba! Tum kitem somzota? Tukam zai tosli currency hanv exchange kortam

Uttordekar: (dusro upai naslolean ek ordho Dinar kaddun tachea hathan ghalta)

Kalapukar: Half Dinar?? Indieche 75 rupia zata, ami xemboram sokoil ekui poiso ghenam, anik ek ordho Dinar di, hanv tukam 50 rupia change ditam

Uttordekar: 50 rupia? Are 50 rupianim ek cheruch panv passun ienam?

Kalapukar: Zanai tor tum? Torui astanam ordho Dinar gheun bhovta, ghe he 20 dinar ani St. Francis bar-an boss, Indieche tin sadetin hozar zatole kanant ghalunk pavta zalear poi! (Uttordekar veta).....


Uttordekar gelea uprant sumar eka ordea vorant, 7 foot unchayache Parrikar aplea kutumba borobor amurkoch hanso diun amche somor ubbe zale, aplo hanso tamboi nastanam...

Parrikar: Kosso assai? Azunui bhik magtai? (ekar ek korun don prosn amcher xevtile, amkam mhonnath zinth marli karan ami kuveitt astanam bore asle atam amchi poristiti bigoddlea oxem kitem taka sangche mhunn tonddantlem tonddantunch chablem ani fatt fuddem chintinastam amchem rozar suru kelem).

Kalapukar: Assa re boro, Saibachea navant kitem ghaal re baba (tachi ghorkan ani bhurgim amkam polloun tanchea tonddant uttram nam zalim, mhaka dista tanim amkam vollkonk nam mhunn)

Parrikar: (Suit-ak aslolim soglim bailim bhitorlim bolsam topaslea uprant) No Change.


Kalapukar: Amchie aiz bonni zaunk nam (fuddem bhott dakhoun) tea chamaraxim modd assonk favo

Parrikar: (porot amurkoch hanso hanssun) paimche moche dakhoun hi size tachea lagim astoli?

Kalapukar: (Kallzak dhir gheub) tukam size zai vo modd zai?

Parrikar: Atam duddu konn gheun bhonvta re? atam soglem e-zalam, (7 foot unchai aslolean pois ek vist bonvdaita) Hanga ATM nam kitem?

Kalapukar: ATM kiteak? (bag ugodtta ani parrikar-ache poros borem margaichem Jodhpuri suit ani raja maharaja ghalta tosle x-tra large size moche ghalta, bagant credit payment machine assta tem gheun) Card Please!....

Parrikar: Avois, hem ani kitem? Tum poilo e-bhikari mur're..... (veta)

Kalapukar: Upkar korun..... tuven hem poilem poloilam mhunn www.goa-world.com Internet-ar matth boroi nakam...


(Xevott)

(c) All rights reserved.
Boroupi: Dominic Araujo (Kalapurkar/Kuwait)
Exclusive to www.goa-world.com