Konknniche Gorenkar?

Konknniche Gorenkar?

Gorjecho Niyall:
Ami, Gõykaramni , amche Maim Bhaxechea fuddara vixim il'lo niyall kelear borem zaupachem. Amche Maim Bhaxecho fuddar kitem? Aiz , odik korun, Ut'tor Gõyant, kitlo-so lok Konknni uloitat? Amcho Kristi Somaz Konknni kitli vaportat? Amchea Igorzamni ani dusrea dhormik zageancher legun Konknnicho vapor unno zait veta ki na?
Aichi Poristhiti:
Amcheo Zomati, Firgozamni legun Inglezintlean choltat. Amchim Kazaram ani her Somajik Mellave Inglezintlean zatat. Kherit bhaxen ami tor sutt ghalun, tie marun ani mei-moche ghalun kazarank vo dusrea oslea Mellaveank geleanv zalear Konknni uloup mhollear ek attvich vost (anachronism) koxi dista. Sodam Konknni uloupi legun hea Mellaveamni ekameka lagim inglez uloitat. Ami Kristi lok fonacher legun khoinchi bhas vaportanv? “Hello, hello” zatoch magir Inglezuch cholta nhoi?

Iadnik ani Tiatrist:
Ami zaite pavtti oxem mhonnlelem aikolam - “Amchi Konknni Bhas Padrimni ani Tiatristamni samball'llea”, hantum dubav na. Punn aiz oxem ghoddta kai? Kitlea Igorzamni Padrich Inglezintlean Misam ani dusreo Sevadhormik Riti suru korinant zait? Kazaram, Mornnacheo Riti ani Aitarachim Misam legun kitlea Igorzamni aiz Inglezintlean vaddot gelolim ami polletanv. Ani Doton? Tornnateancheo Zomati? Ani Padri loka lagim uloitana Inglezuch tastat ki na?
Ani Tiatristanchem kitem? Machier aplim gitam gaitana, ani nattkulim kortana Konknni Bhaxek khup fulam malltat. Konknnik amcho Serkar favo to adar dina dekhun khup dukham golloitat. Magir kitem? Machievelim
denvtoch ani lokak melltoch khoinchi bhas uloitat? Ekameka kodde kosli bhas uloitat? Ani aplea ghoramni?



Amche Ghorabe:
Soglleam von gombhir poristhiti mhollear amchea ghorabeamni ghoddta tem. Atam sogllea ghorabeamni Inglez suru zalea. Odik korun bhurgeam lagim, tanchi vachea sutt'ttanch Inglez ulounk lagtanv: 'Mummy- Daddy'
thaun tem magir Inglezuch-Inglez. Mhaka vhoddantli vhodd dukh bhogta
ti mhollear hanv aiz bhurgeam lagim Konknni uloilear tim mhojea
tonddak yede vhodd dolle korun polleunk lagtat ani oxea vellar
hanvuch ghuspagondollak sampddon ' hanv Chini bi uloilom kai?' oxem
chintunk poddtam.
Gõykarancho Fuddar:
Ami khas Gõykar amcheach Gõyant, unne zait vetanv ani hem chodd korun
tin karonnank lagon:
1. Gõykarank bhurgim unnim zait geleant: tin aslim tim don zalim ani
atam ekuch zalam.
2. Purtugalak, Amerikek, Australiak ani dusrea Ostomtechea Desamni vochpachi Goykaranchi volleri vaddot asa.
3. Amchem Goy Bihari, Bijapuri, Russi, Israeli , Nigeri, adi. Hannim bhorot asa. Osle poristhitint anik thoddeanch vorsamni Goyant niz Goykarank sodunk disa uzvadda legun divo gheun bhonvcho poddtolo. Ani hanga urtat te Goykar Konknni uloinant zalear divo-i gheun bhonvlear te mellche nant.
Konknni ani Goykar:
Konknni amchi Goykaranchi Maim-bhas. Ami, Goykar Goyam bhair vetoch khoinchi bhas uloitanv? Tea-tea ganvchi nhoi? Haka dubavuch na ani
hantum kaim vaitt na. Romak astana Romkar jiyetat te bhaxen jiyeunk
zai. Bhailea ganvcho lok Gõyam yetoch, amchea posreancher, kocherimni
kam' kortat. Ami tanche lagim khoinchi bhas uloitanv? Inglez vo
Hindi. Konknni uloinanv ani Konknni uloilear amchim kamam zainant.
Guneanv konnacho?
Tor kitem korchem?
Survatek hanvem 'Konknniche Gorenkar' oxem mhonnonk na, punn ek vichar kela. Hea vicharak ami vhoddlean NA mhonn zabab diteleanv ani amchi Konknni Bhas ani tech borabor amchem GÕY samballteleanv zalear amcheruch, mhonnge MHOJER ani TUJER dhorlelem asa: Konknni Boroy, Konknni Vach ani kherit, kherit bhaxen KONKNNI ULOY.

Hem amchech ghorabeamni suru korum-ia:
1. Amchea Bhurgeam lagim Konknni uloum-ia. Inglez, Hindi xiklear tantum vaitt na. Punn Konknni poilea-voilea zagear dovorum-ia.
Ghorant Konknnich uloum-ia. Na zalear loz bextti.
2. Dusream lagim uloitana Konknni ulounk suru kor, magir dusre bhaxek gelear zata. Bosimni, Kocherimni, Posreancher Konknnint vichar suru kor. Tankam Gõyant asat mhonn ugddas tori yeum-di.
3. Fon kortana Konknnintlean voddki.
4. Tum ekloch zaxi mhonn bhiyeum naka. Suru kor. Ek-ek-ek mhollear tin zale; tin-tin-tin mhollear nov zale ani oso ank vaddot vetolo ani Konknniche Gorenkar unne zatele.
Konknniche Gorenkar? NA, oxem zaunk diunchem nhoi.


ALMIR DE SOUSA