“Ghov-bailechem ek chit, moddkent zata xit”
Kazar Devachem ek apovnnem. Logn zavche adim ek cheddo ani cheddum disachim porian sopnetat. Tankam zai tanchem logni jivit khoxal zal'lem. Tim eka-meka khatir koslea-i tyag-sakrifis korunk toyar astat. Kazar zavche adim tim fokot mogachi bhas zannant ani hi mogachi bhas tim vhodda mogan uloitat. Punn aplea khorea rupacher rupnnem ghalun tim jiyetat. Aplem khorem rup dusreak koll'lear aplem kazar zavchem na mhonn tankam bhirant asa. Jem kitem jivitant vaitt ghoddlam tem dusreak kollounk tim toyar nant. Sanglench zalear bexttem voilea-voir sangtat. Apnnak ogunn asat te tim lipoun dovortat. Rag yeta to dusreak kolloinant, nosay zata ti kallzant damun dovortat; duddvanchi axa aslear tachi khoboruch kaddinant, gorvan choddlolo aslear lhanvikayen denvtat. Fokot dusrea pasot jiyetolim kai distat. Novreak vo hoklek matxe porian kitem-i zalear, sonvsar tanchea mathear poddta. Tim piddent asloleachi kitlech pavtti khobor ghetat. Ekamekak kitle-i pavtt bhettounk tim toyar. Fonacher voranchim voram uloilear pasun tankam puro zaina. ‘I live you’ mhonnlea bhogor tim fon khala dovrinant. Konn-ui tankam pollelear tancho mog sasnnak togpacho kai dista. Dusrea cheddea vo cheddva lagim sompeponnim tim uloinant. 'Tunch mhaka zai', hi tanchea mogachi bhas! Kazaracho dis udelo. Sopnel'lim sopnam sakar zali. Novro-hokol aslim tim atam ghov ani bail zalim. Nigtinch kazar zaleleancho mog anik-ui pett'ta. Sasumai aslear suniek poiloch choddso vavr korunk dina, punn sun fattim ravunk sodina, fuddem vochun kuznant ghuspota. Adim ti aplea novreachea bapaik ani avoyk 'uncle' ani 'aunty' mhonntali, ti atam tankam 'daddy' ani 'mummy' mhonnun mogan pacharta. Zanvoim sasupaik ani sasumaink tosoch pacharta. Jivitant cheddo ani cheddum eksurim jiyeun ailolim atam dogaimk-ui ekttaim jiyeupachi sonvoy zata. Ekamekachea hatak dhorun tim bhonvtat, konn-ui eklo vavurta zalear, dusro taka adar dita, khoimsor vetat zalear boraboruch vetat, jevtana pasun ekamekak bhoroitat, konn-ui matxe piddent poddlear borich kallji ghetat, vetana 'kiss' divnuch nhidunk vetat.
Kazari jivit sufoll ani khoxalkayechem zavnk, magnnem chodd gorjechem. Nhoi fokot dukha ani pidde vellar, punn sukha ani bholaike vellar tannim Devacho ugddas korunk zai. Borem jivit jiyeunk Deva lagim adar magcho. Ogeponnim chaklam-bhoglam tem khoxal kallzan ekamekak sangchem, dhin'vas attounche, porbim divchim. Monis ami, osoktayen chuktat. Tea disak chukla zalear, khalti zavnk misachi bhett khupuch adar dita. Devachea utrantlean logn zal'leank nirop mellta ani ho nirop jiyeunk Jezuchea kuddi-rogtan boll favta. Misant vantto ghetana ghovan ani bailen eka zagear ravchem. Xanti ditana ekamekak xanti divchi ani osokt zal'le som'bondh mozbut korche. Dor disa tersachea magnneant Jezuchea soddvonnechea ghuttancher niyall korun, Saibinnicho adar magcho.
Logni jivit sufoll ani khuxalkayechem zanvk logn zal'leamne eka mekak asa toxim manun ghenvk zai. Kallo asa to goro za, mottem asa tem te barik za, mottvo asa to lamb za, oxem cholta tem te bhaxen chol, oxem mhunnonk zai. Devan ek-ekleak aplea sarkeacho punn veg-vegllo rochla ani taka ek kheritponn dilam. Ami asa tosoch eka-mekak manun ghetanv tednam amcho mog vaddta. Osoktayen khala poddtanv. Amchea patkank ani vaitt sonvoyank lagun ami dusreank dukoitanv. Gorvak fatt korun, khalti zavn dusrea lagim bhogsonnem maglear, kurpechi zhor vhanvtoli. Kazari jivitant osoktayechim doram mozbut zatelim ani sontos porot favtolo. Ghov-bailechem ek vhit zatoch moddkean xit zatelem ani ghorabeachi buniad okhondd zavnk pavtoli.
Pri. Nevel Vell’lekar
V-Ixtt.com hanchea upkarant
Subscribe to:
Post Comments (Atom)
No comments:
Post a Comment