Voparinchea Bhanddarantlem

Voparinchea Bhanddarantlem:
“ Adim Dom Pedro, Atam Pedurlo”

“Nanvant kitem asa?”.-..... oxem mhollolem ami zaite pavtt aikolam. Khorem mhollear nanvant zaitem asa. Amchem nanv amchi ollokh dita, borem jivit jiyelear amchea nanvak man yeta, ami vaittache gulam’ zalear amchea nanvacho beman zata. Amchea poilea nanvak ami Kristi nanv mhonn-tanv zalear, thoddeank tanchea kuttumbachea nanvan (alcunj) ollkho-tat. Amchea ghorannea-chem vhoddponn am-chea kuttumbachea nanvant asa.
Adim amchea Kristi ghorabeamnim bhur-geank Saibinnichim vo Santam-Bhoktanchim nanvam ghaltalim. Oslim bhurgeank nanvam ghalunk avoi-bapaicho ek hetu aslo. Tim ek bhagevont jivit jiyeunk tanchem mon aslem. Amchem nanv koslem-i tem zaum, punn zaiteam nanvank orth asa. Ami amchea nanvam por-mannem jiyeleanv? Thoddim nanvam zorui tim khup valorachim, torui tim nanvam asloleam mon’xachem jivit urfattench zalam. Tan-chem nanv Saibinni-chem vo Santam-Bhoktan-chem, punn tanchem jivit devchara-chem. Bhoktak tannim okman kela. Tim bore dekhichim zavnk nant.
Thoddeanchim nanvam bhov gomo-tichim Piedade, Con-ceicao, mhollear dadlo vo ostori ti kainch gomonam. Hanv Diva-ddechea Piedade Saibi-nniche Igorjent gonvllik vavr kortalom tednam ek avoi aplea cheddum bhurgeak Saibinnichem nanv, Piedade ghalunk aili. Piedade, cheddo vo cheddum tem kainch somzonam, oxem tika zaiti somzaili. ‘Aplem nanv Piedade mhonn tea sobit cheddvak vhodd zatoch loz zait, dekhun Piety tori tika nanv ghal’ mhonn hanvem tika zaitem suchoilem. Punn ti koxich halonam zali. Tea cheddvak Piedade mhonn zapailearuch, aiz tem lojen apli man khala ghalta.
Thoddeanchim nan-vam orth naslolim. To dans tednach ailolo. Tea nachachem nanv ko-nnem aplea cheddeak ghalem. Aiz taka ‘Disco’ mhollear konn-ui ollk-hota. Taka nachunk titlem gomonam, punn Disco mhollear to rokddoch paim haloita. ‘Skylab’ ontrollar disti poddlem ani konnem aplea cheddvak tea nanvan Povitr Snan dilo. Ani fuddarak koslim novlam ghoddchim asat?
Thoddim disa por-mannem nanvam asat. Adim ‘Almanak’ pollevn tea disacho Sant vo nanv konn tem pollevn bhurgeak nanv dovor-talim, ozun dovortat. Itihasik dis nanvamnim aileat. Jezuchea punor-jivont-ponnak konn-ui zolmolear to Resurrecao zata. Povitr Khursachea Zoitache Porbe somoyar zolmota taka, Exaltacao mhonn-tat. Purificacao, Comme-moracao oslim disa pormannem am-kam nanvam melltat. Punn hea kallar oslim nanvam sobit kai?
Don nanvanchim okxoram kaddun tho-ddeamnim bhurgeank nanvam ghaleant Me-nino ani Natalinachem cheddum Mena zalam Josinho ani Elsie-cho cheddo Joel zala. Him nanvam vaitt nhoi, punn kednaim-kednaim oslim nanvam hanso haddtat. Ligorio ani Onorata-hancho put ‘Lion’ zavnk nam? Thoddeanchim nanvam dakttim keleant Natal Natty zalam, Antonette Antu zalam, Alvaro Alu zala ani Bostiao Bobby zala. Magir osleank tanchea nanvan konn ollkonam, hea ‘short form’-anuch ollkhotat. Tinch pasun tanchi khorim navam thodde pavtt visortat.
Thoddeam ghora-beank mon’zatichea nanvamnim ollkhotat. Mazrager, Koleanger, Vaghanger, Xinvanger, Makddanger mhollear tanchim ghoram rokdd-inch melltat. Toxinch thoddeank add nanvam asat. Garsul’lo, hodd’-ddo, undir mhonn te famad zaleat. Thodde pavtti okmanachim nanvam tim!
Thoddeank nanva-mnim ollkhonant punn ‘pet names’ asat tachean ollkhotat, Bushan, Baby, Bebe, Nanu, Nana oslim pet names vete-panvlak melltat. Tanchim sarkim nanvam kaddlear konn-ak ulo kela mhonn tim ogich ravtat, punn tanchim ‘pet names’ kaddlear tim rokddinch zagovtat. Kazari ekame-kak ‘Honey’ ‘Shana’, ‘Love’, ‘Sweetheart’, ‘Raja-Rani’, ‘Prince’, ‘Princess’, ‘Queen’ heam nan-vamnim pachartat. Punn thoddeach kallan tanchi goddsann veta.
Thoddeam mon’xa-chim nanvam zon’va-rank ghaltat, Sunneank Roger, Bruce Lee ani mazarak Sangeeta ani Ruby, ho mon’xank kedo vhoddlo okman!
Kitem zaum koslem-i nanv amkam asum, Dom Pedru Pedrulo zaum, punn amchem jivit Devachea moga-chem ani peleache sevechem zaum!

Nevel Vell’lekar
_________________

Voparinchea Bhanddarantlem:
“ Eka lognak bara vignam”
‘Love Marriages v/s Proposed / Arranged Marriages’, hea vixoyacher ek pavtt ‘debate’ zali. Zaitim karonnam sangun, ap-aplo pongodd zoitivont korunk, tornnateanche proytn zale. Mogachim lognam borim mhonn, ek pongodd aplim karonnam sangot ravlo. Mogan logn zalolo zat-kat mandinam, gorib-girest mhonn vollkhonam, nennar-zannaranchi ontor korinam, punn sogllea vegllocharacher tancho mog zoit vhorta. Mogan axil’lo aplea sangateak asa toso mandun gheta ani tacho mog torekvar proxnank fuddo korta.
Soirikechim lognam borim mhonntolim oxem mhonno: Mog-mog mhonntat tim lognam adinch fog kortat. Zaite pavtt avoi-bapaiche khuxe add, tancho axirvad nastanam tim logn zatat. Tea uprant tanchea logni jivitant vhoddilanchi budh ani adar tankam mellonam.
Don-ui pongodd zhogoddtanam, eklean oso aplo sondex dilo. “Amkam mogachim lognam nakat ani soirikechim lognam nakat. Amkam zai teo ‘proposed love marriages’. Konn tori vo zonn eklo dusreak ‘propose’ korta ani magir tancho mog zata. Mogachi tenkxi koxi, tancho mog lognachi gantt marta. Koslim-i zaum tim lognam, punn aiz tankam bara vignam. Kiteak kai?
Aiz logn zal’leam modem magnnem nam. Sokallim utt’tanam ghov-bail veg-vegllea vellar utt’tat. Punn nhidunk tori vangdda vochunk zai aslem. Nhidunk veche adim Devak ani ekamekak dhin’vaslolo zalear, Devachem ani ekamekachem bhogsonnem maglolem zalear, Deva ani ekameka mukhar apleo gorzo khaltikayen ghaleleo zalear...oslem magnnem logni jivitant folladik zavpachem. Devachem Utor amchea panvlank uzvadd zata, tersachem magnnem Saibinnichi bhokti vaddoita ani Jezuchea soddvonnechea ghuttant amkam vantto dita.
Aiz logn zal’leam modem somjikai nam, sosnnikai nam. Ekamekak tim asat toxim mandun ghenant. Eka mekacheo osoktayo somzonant. Dusreacheo chukeoch kaddtat. Dhin’vasnni disonam. Khaltikai nam, sogllo gorvixtt utrancho boddbodd! Zonn eklo ap-aple bhaxen sogllim kamam korunk sodta, dusreacho adar-sohokar ghevnk sodinam. Matxi chuk zalear, sogllench ifern zata. Jem lhan utramnim, somjikayen sangum yetalem, tem ragan tapon sangtat. Sosnnikai mat-ui disonam. Haka lagun aiz lognam tuttun-futtun poddtat. Aiz logn zal’leam modem bhogsonnem nam. Monis osokt. Osoktayen to khala poddta. Punn dusro taka somzun ghenam. Bhogsunk konnuch toyar nam. Dusreacheo chuki monis bhogxinam tem pollevn to aplea khas jivitant chuk korinam-so dista. Bhogsonnem dinastana-ghenastanam aiz kitlim logn zalelim vorsanchim-vorsam ragan ani ekameka lagim uloinastanam jiyetat. Oslim Deva koddlean tori aple chukik bhogsonnem magtat kai?
Aiz logn zal’leam modem bhasabhas nam. Zonn eklo aplea monantlem korta. Dusrea kodde ani budh ghevop nam. Apunn korta tem sodanch sarkem, oxem taka dista. Ani taka dusrea lagim ulovnk, bhasabhas korunk vell nam. Bhasabhas kel’li zalear kitle proxn suttave zavpache, kitle dubav pois zavpache, ani logni jivitant kosle tharav ghetat te yesvont zavpache. Dog zannanchim chintnam ani dog zannanche anvdde bhasabhas korun ekttaim haddlear, logni jivit mozbut zavpachem. Logna disa dadlo ani ostori kallzan, monan otmean ani kuddin ek zal’lim. Logni jivitantlim vignam pois korunk, anvdel’le anvdde ani chintlelim chintnam logn zal’leancho sasnnik bandpas mozbut korum-di.

Nevel Vell’lekar
________________

Voparinchea Bhanddarantlem:
“Mazor Maslli Soddit, Tednam Bebdo Soro Soddtolo”
Bebdikai ek pidda. Bebdikayek lagun kitleamnim aplem jivit ibaddlam, ghorabe kosoddleat ani somazachem noxtt vaddoilam. He piddek ilaz asa mhonn zaite visorleat. Punn zannim aplem bebdikayechem patok ollkhun ghetlam, jivit novsorlam, tannem khoxalkayechem zoit melloilam.
Nicky D. hachi khobor zaiteamnim aikolea. Tachem mullavem nanv Nicholas D’Silva. Vell’lle ganvcho, amcho soiro to. Belganv xiktalo. Xikpant ani khellant huxar aslo. Ixttam borabor misoll zatanam soreant-ui misoll zalo. Bebdikayechea barantuch xikop sompoilem. Mumboichea ‘Bank of Baroda’-nt-ui nokri melloili. Eka disak ‘Bank Cashier’ zalear dusrea disa Benkichea panvddear bosun moddiche poixe meztalo. kazarache pirayecho zatoch, Leonniechea mogan poddlo. Tika mellunk vetanam soro kednach pivunk nam ani Leonniek Nicholas bebdo mhonn kosloch dubav poddunk nam. Kazar zatoch tanchea ekvottak dogam bhurgim zolmolim, Myrtle ani Maud. Itlea mhonnosor Nicholas-an aplea kazarachem sutt ani kazarachi mudi pasun vikun kaddloli. Poixeank patixer zavn to Leonniek boddoitalo. Nicholas eka darantlean bhitor sorta zalear, Leonnie, dogaim bhurgeank khankeant marun, dusrea darantlean dhanvtalem. Mezachea govetant, ghalun pasun, tinnem bhurgeank samball’lim. Myrtle iskolak vetana, Nicholas lokot-lokot aple dhuvek soreache noxer pavounk vetalo. Sisterin taka pollelo ani to konn kai mhonn Myrtlea lagim vicharlem. To bebdo aplo bapui mhonn sangunk, taka loz disli. To aplo bapui nhoi, punn aplo ek xezari mhonn tannem sanglem. Hi khobor dusrea disa iskolak vetanam, Myrtlean aple avoik sangli. Tednam Nicholas nigtoch uttlolo. Aple dhuvechi khobor aikun taka jintt marli. Apleak lagun aplo ghorabo sonsta, hem taka thavem zalem. Dolleantlean dukham vhanvtalim. Apunn soro soddtolo mhonn thoinchea thoimsor tannem nichev kelo. Tea disa thaun tannem soreacho ghontt ghevnk nam. Nicholas aslo to Nicky D. zavn bebdikayek sampoddloleank he piddentlo bhair kaddunk vavurta. Ratchea khuinchea-i vellar, konnem-i fon marlear, tanchea akantak rokddoch dhanvta. ‘Mercilite’ hem AA-chem masik to vhodda umedin choloita. Nicky D hem uzvaddit kirnn soglleak fankarit asa.
Zaiteank hi bebdikai bhurgeponnich suru zata. Kazarank ‘party’-ank soro funkott mellta. Funkeacho soro aiche tornnate dhonkit ravtat. Tanchea pievpak xim’ ani mer nam. Zo tornnato piyenam to tanchea borabor sobonam, taka kuxin kaddtat. Aiche tornnate, bieracher suru kortat...... tea uprant viski, brendi, rum, xevottak feni! To soro ‘branded’ asunkuch naka, koslo-i upkarta. Funkea mellonam tednam poixeamnim piyetat. Piyeunk poixe nam zatoch chortat, nagoitat. Mhojea jivitant hanv ‘wine’ soddun kosloch soro pielolo nam. ‘Cheddum zalam re, hatak kanknnam ghalun bhonv,’ oxe mhaka challoitale. Heam mhojeam ixttank sokallim utt’tanch soreacho ghontt zai zalo. Nam zalear tanche hat koddkoddtale. Sokallim dha vaztam, te maddak veng marun astale. Tantuntle thodde aiz maddak veng marlole-i disonant. Challis zavche adim morun somple.
Bebdikayek sampoddlolo monis aplench jivit ibaddta. Tachea jivitant tea uprant Devak zago uronam, magnnem, mis, ters mhollear taka ek fokann koxem zata. To magir chor-nagovnno zata. Tachea tonddantlean noxtteam utranchem lisanv bhair sorta. Taka sarki jhem poddonam. To torekvar piddancho gulam’ zavn bhonvta. Apli zobabdari visorta. Tachea jivitantlo hetu pollun veta. Nitollsann mhellsannint bodolta. To aple mornnache dis mezta.
Bebdikayek sampoddlolo monis aplo ghorabo konsllun uddoita. Taka ghorabeacho ‘time table’ lagonam. Taka lagun tachim ghorchim vangddi sonstat. Tea bebdeak lagun tankam kitlem mhonn unneponn! Osoch mhozo ek titiv aslo. Newton 45 mhollear taka konn-ui vollkhotalo. Tannem aplem jivit soreak bhettoilelem. ‘Are to tuzo soiro nhoi re’ oxem mhoje ixtt mhojim fokannam kortale. ‘Soiro nhoi, punn mhozo khas rogtacho titiv to’ oxem mhoje ixtt mhojim fokannam kortale. Soro pivon-pivon to somplo. Ghorabeacher kallo dag ghalun gelo.
Bebdikayek sampoddlolo monis somazachem noxtt vaddoita. Taka konnuch man dinam, punn ho somaz taka kenddta. Eka bebdeak lagun somaza-chi xanti bigoddta, bolatkar vaddtat, khun-maramari choddta, fodd-modd, zhuzam-moddam toyar kortat. Somazant ontor disun yeta.
Bebdikai jivitachem, ghorabeachem, somazachem, nisonnton korit asa. Ani voilean bebde lok, Jezun udkacher axirvad ghalun soro kel’lo, to vaitt zavnk zainam oxe boddboddtat. Jezun soro mon’xachi loz vattavnk kel’lo, il’lo piyelear vaitt nhoi to, punn hispa bhair piyelear, soglleankuch lojek ghalta. Soro sodd ani novea jivitak survat kor, tednam Dev tujem jivit, ghorabo ani ho somaz axirvadan bhortolo.

Nevel Vell’lekar

_________________

Voparinchea Bhanddarantlem:
“ Addechea Udkan Rikami Baim Bhoronam”
Soimbik girestkayen ami girest zale. Kai borim tim nhesnnam, kuddichi sobitai vaddoitalim! Kai borem tem ghorant toyar kelelim ruchichim jevnnam amchi kudd mozbut kortalim! Punn aiz amchea nhespachim ani jevpachim ‘fashion’-am bodlot asa. Punn hi ‘fashion’-am amkam faideak poddtat vo nam, hem sangonk mat avgodd zata!
Adim igorjentuch nhoi, punn adlo lok sodanch moriadin nhestalo. Cheddvam bhailo ‘maxi’ nam zalear, apli nheson dimbie khala ghaltalim. Tea kallar nhesnnak ‘cut’ naslole. Choddxim miriechim nhesnnam distalim, cheddvam kalsanvam ghalunk loztalim, ostoreo saddio nheslear bombleo dakhounk fattim sortaleo. Chedde, dadle choddxe ‘formal’ nhestale, ‘jeans’-ui naslim, kaichea kai nhesop moriadi bhair poddta, oso tancho somoz aslo. Adlea kallar moriadin nheson sogllim sobit distalim ani moriadin nheson-ui amchean sobit disum yeta, hem tannim amkam spoxttponnim dakhoilem.
Atam ‘fashion’-achim addechim udkam amchi nhespachi tan bhagounk sodtat. Tan bagoitat punn kuddik kosloch gunn poddonam. Lamb kens dovrun ostori sobit dislo. Atam lamb kensachi konnak addkholl zata vo te kens sobitayen samballunk tanchean zainant dista. Thoddeank mottve kens bore distat, soglleank nhoi. Atam kitlech addeche kens vo ‘Wigs’ ailelim asat. Hodd’ddo zalear pasun ‘grafting’ korun kens ghaltat. ‘Wigs’ mhonn ani koslim.... thoddim chevrisam mathear ghalun bhonvtat kai dista, thoddeanche tokler onos piklam tem polleun hansunk yeta. Thoddeanchem ‘wig’ rosrosxit kallea kensachem punn tem ghaltoleache tonddak mat mirio poddleat. Sogllim kortat mhonn thoddim apnn-ui kens tambdde kortat. Te magir apleak sobta vo nam, tem ani pollevop nam, ‘Indian Hippy’ zaun soglleak bhonvtat. Atam kitleach torecho ‘make-up’ aila. Amche katik ‘match’ zatole ‘make-up’-ache ank asat. Punn konnem tori amkam ‘gift’ dilolo ‘make-up’ aplea tonddak sobta vo nam tem pollenastanam tonddak kallo lep, magir thoddim rupnnem ghalun bhonvtat kai dista! Kednach tinnem ‘make-up’ korunkuch nam, punn nhesounk yetat tim oklecher itlo lep thaptat, ti magir okol ollkhunkuch mellonam ani oklechi maim magir ‘make-up’ korun aplea tonddacheo mirio kaddun oklechi bhoinn koxi dista. Kitle-i dukhum atam ‘eyebrows’ kaddpachem anik ‘fashion’ zalam. ‘Lipstick’ pasun atam chikchikamnim chokchokta. Ho addecho chomotkar korun amkam ‘allergy’ pasun zaum punn atanchi pillgi hem sogott soddunk toyar nam. Ani atanchi nhesnnam ani koslim, Saiba! Konnachi fatt ugtich asta. Magir fattir kosli-i kollovnni vo ‘notice’ boroum yeta. Konnacho fuddo ugtoch dovortat. Ani cheddeank dadleank tallnneache gulam’ kortat. Thoddeanchim nhesnnam fintancher lambtat. Tem fint chukon tuttlem zalear....! Thoddeanchim nhesnnam ‘tight fit’ bhitor kitem nheslam tem sogott kollta. Chedde, dadle ani ‘Advertisement T-shirts’ ghalun eke vostucho prochar kortat. Tanchea angar aslolem ‘tight’ nhesnnam tanchi kuddichi ollokh ditat. Moche ani kosle? Thoddeamnim te moche ghalun ani cholunk zainam, punn aplea sangatea borabor lamb disunk zai mhonn te ghalun ttok-ttok korun bhonvtat. Atam nhespachim kitlinch ‘fashion’-am aileant khorim, punn khuim kitem ghalop ani apunn nhesta tem apleak sobta zalear aiz monis polleunk ani apleak vicharunk visorla.
Ani aiz ‘fast foods’ ani zaleat kitle! Ghorant kitlem-i borem rand, aichea bhurgeank ani tornnateank tench borem lagta. Ami tan laglear udok piyetale, atam il’lo pot’to konnak sangonastanam fridgin vochun ‘pepsi’ vo ‘coke’ donktat. Tim jivitak vaitt mhonn kitem-i sang, konn aikota? Ghorchem jevonn ruchichem, punn ti rosteaveli ros-omlette, noodles, tanduri odik ruchik lagta. Heo rosteaveleo vostu koxeo ani kitem vapddun toyar kortat tem pollelear teo ani khavunkuch nakat. Ani oslea rosteavelea jevnnak ami kitle mhonn poixe khorch kortat! Ani oslim jevnnam jevun pottak vaittak poddlear formasint amkam pil’lam melltach. Ani oslim jevnnam haddun khatoch randtolo susti zata. Ek pavtt hotelant jevlear Aitarachem porian amkam thoim-soruch vochunk dista. Osleam jevnnamnim ami amchi bholaiki ibaddun uddoitat.
Monant haddchem............... soimbik sodanch togotlem, addechem tem soimbik girestkai pokrun khatelem.

Nevel Vell’lekar

________________

Voparinchea Bhanddarantlem:
Thoddem Ulovchem, Chodd Aikochem
Ek zannar mhonntalo “Devan amkam jib ani don kan dileat........ thoddem ulounk ani chodd aikonk. Punn ami portench kortanv. Eke jiben ami chodd uloitanv ani don kanamnim ami thoddem aikotanv. Dadlo ek kanan aikota ani dusrea kanan bhair ghalta. Ostori don-ui kanamnim aikota ani jiben bhair ghalta........” tea zannarachea heam utramnim sot disun yeta. Oxem sot zalear ami thoddem ulovchem ani chodd aikochem.
Kitem ulovpachem? Mhotvachench tench uloi, “Tujem ulovp oi zalear oi, nam zalear nam zaum-di. Ogllem kitem tem devchara koddlean yeta”....... oxem kitem amkam Povitr Pustokant mellta. Thoddem ani gorjechem tem uloita taka xanno mhonntat. Konnak koslo-i proxn vicharpacho asa zalear thoddeanch utramnim spoxttponnim vichar ani konnak zobab diuncho asa zalear thoddeach gorjecheam utramnim di, hantunuch xanneponn asa.
Konnak bhett ditanam ulovpachem asa zalear, tum bhettek gela tachem boreponn uloi, tachi khobor ghe, tuzoch boddbodd korun, tujench pemprem vazoinaka. Tujeam utramnim gorjevontank husko, piddevontank bholaiki, eksureank sangat, dukhestank buzvonn ani patkeank uzvadd mellum-di.
Tum uloita tim utram mansugechim zaum-di. Amcheam utramnim ami rag posraitanv...... amchea utrantlean mog mellum-di! Amchim utram pozddim zait asat......amcheam utramnim ami nirmollponn rakchem! Amcheam utamnim ami fott uloitanv..... utram sot ulounk ami vapuddchim! Utram vapddun ami Devachem nanv be-manan ghetanv...... Devak amchea ek-ek utrantlean man diuncho!
Kedna-i amkam konn-ui bhettlo zalear zaite pavtt ami amchench ani amchea kuttumbachench vhoddponn sangtanv. Amchench boddoitanv. Ani zaite pavtti dogam bhett’tat tednam ami amchem uloinanv, punn dusreancheo khobro kortanv. Taka amcheam utramnim khala apttitanv, tachea nanvache vadre korun soddtanv. Pollenastanam porian, dubavi vik monant dovrun tem amchea toddantlean onktanv.
Thoddeank amkam rokddoch rag yeta. Ani uprant ami ragan uloitanv. Ani ragachea bharar kitem uloilam tem rokddench visortanv. Tich vost amchean mogan sangonk yetali. Ragan-tapon uloilear dusro somzotolo oxem amkam dista. Tich vost mogan ani sonsnikayen sanglear dusro bore bhaxen aikota, somzota ani pallta. Aiz-kal ragan-tapon sangche bodla, ‘Baba, Puta!’ mhonn dis kaddunk zai.
Chodd boballta to apli oskotai dakhoita. Chintinastanam uloita tachem fals poddta, anik zaitem dukh nirmann korta. Ji dusreachi chuk amcheamnim dusrea utramnim sangum yetali ani dusream utramnim sanglolem taka somzota aslolem zalear soroll utramnim sangun dusreak okman korchi goroz nam.
Monis osokt. Osoktayen to chukta. Punn apli chuk ollkhun ghevn to novem jivit suru korunk sodta. Amchea thoddeanch utramnim ami zaite pavtt tacheo adleo chuki ustitanv. Ani teo tachea tonddar martanv. ‘Tujean ani novem jivit jiyeunk zavchem nam. Tuka tujem adlench jivit borem......’ oxem taka ami sangunk sodtat kai?
Aikochem chodd, hem zobor godd. Dusreak aikotanam, zoim bobatt nam, ani bore bhaxen mon lavun aikunk zata, oslo zago vichun tankam aik. Tankam aplem kalliz tuka ugtem korum-di. Tim uloita tem tum chit divn aikota tednach tankam somadan zata. Tim uloita tem tankam sompoum-di. Tum modemkot uloinaka. Tanchem ulovop chalu dovrunk tujean ek-don utram mhonnum yeta. Tum tankam aikota mhonn tuje chalintlean taka kollun yeum-di. Tim tuka sangta tednam jem kitem tannim tuka ugtem kelam, tem tum anik konnak sangchonam mhonn to tujer patiyeta. Ani tachea visvasak ghat korinaka!
Ho aikopacho xegunn soglleank ascho. Nam tannim apnnaucho. Dusrean tuka sangche adim tum tujench sangonaka. Poilem dusreak aik. Tachea monant kitem asa tem somzun ghe. Tujeam ghorcheank aik. Tuje potinink tuje kocherichea vavrachem kainch somzona zait, punn tichi suchna tuka upeogachi zaum yeta. Tujea ghorkarak tujea randpachem kainch gomonam zait, punn tachea sangnnean tujem jevonn odik ruchik zaum yeta. Avoi-bapai udexim bhurgeamnim, Jezucho tallo aikocho ani jivtachi vatt dhorchi. Dekhun soglleamnim ulovchem thoddem, aikochem chodd, hem zobor godd!

Nevel Vell’lekar
________________
Voparinchea Bhanddarantlem:
“Axa Kelear, Doxea Zata”
Mon’xachi as aiz vaddot asa. Taka kitlem-i mell’lear puro zainam. To anik-ui sodta. Magir ti apli as bhagounk to kosle upay gheta tem ani to pollenam. To ak’kho sonvsar zoddunk sodta ani xevottak fottovta. Tachi axa doxea zata.
Osoch ek monis aslo. Tache lagim khup girestkay asli, punn to imteponnan jiyetalo. Taka anik-ui bhattam-bensam zai distalim. To eka disa anik-ui zomin ghevnk eka bhattkara sorxim gelo. Ho bhattkar hea mon’xachi as polleta ani taka oxi suchna korta - “Mhoje lagim khup zomin, bhattam, xetam, dongor asat. Tum oxem kor, sokallim uttun tum cholunk lag ani sanje vellar porian cholotolo ti zomin hanv tuka ditam.” Ho axecho monis sokallim uttun cholunk lagta. He zomniche axen cholta-choltanam, dhanvunk lagta. Ek vhoddlo zamindar zavnk tachi khuxi. Vatter piyeunk-khavunk ravlear kitlich vatt chuktoli dekhun visov ghenastanam cholot ravta. Don’parachea vellar khup tokta, khala poddta ani morta. Att futtancho zago taka purunk puro zata. Axek gel’lo doxek pavta.
Amchea-i jivitant amkam kosli nam kosli as asa. Thoddeank hea mon’xa bhaxen zomnichi as. Zomin ghor kaddunk ghetat, zomin utpon’n korunk ghetat, punn aiz zomin poixe korunk, apli tizori vaddounk ghetat. Ti zomin magir kaideachi vo kaidea bhair asum, goroz tednam poixe divn hi zomin apnnachi kortat. Punn kaido tacher boddi marta, tednam roddtat kiteak?
Thoddeank apnnachem nanv fankarchi as asa. Tanchem nanv ani fottu kagdacher ailearuch puro te itle khoxal, te tea disak jevpak porian nant. Nanv sangtolo zalearuch te konnak-ui donation divnk toyar. Mukhel soiro kelearuch te adar divnk fuddem sortat. Igorjek lakddache bank, bizleche panke ani altara fuddem marmori ghalunk te toyar asat, punn tankam nanv zai, tanchem nanv thoimsor kantoun ailolem zai. Mon’xam hujir tankam man mell’lo, tanchi axa bhagli, punn Deva hujir he kornnechi doxea zali, Deva koddlean anik kosli mozuri mellchi urlea?
Thoddeank apunn xegunni mhonn porgottpachi tanchi as vaddta. Boro gavpi, vo vachpi, vo vazoupi, vo chitarpi, vo khellpi zalear apunn podvedar, apnna oslo konnuch nam mhonn dakhounk sodtat. Zoim apleak khup poixe melltat thoimsoruch te apli kola vapuddtat. Zoim duddvamnim uloinant thoim, Devache mhoimek aple gunn vapddop ti ek taka kalchi gozal zalea. Apunn aple kolent podvedar, dusreank kikont korun te jiyetat. Devan hi taka kola dilea, hea podvedarachi podvi, tachi kola Devachean eka khinna bhitor portun vhorun, he tache kolechi doxea zaum yeta mhonn, aicho monis kiteak visorla?
Thoddeank nhesnnachi vhodd as. Ekleachinch nhesnnam kitlinch ‘cupboards’ bhortat. Sogllim nhesnnam tim nhestoleak sobtat oxem nam. Nhesnnar nhesnnam ghetolo, hea sonvsarant ek-ui nhesonn nastanam vingllo bhonvta tachem chint’tat kai? Ani apleak sobonam tea nhesnnachi aichea mon’xak kiteak as? Nhesnnam punzavn dovrop tuka apsvarti korta, bemoriadichim nhesnnam tujea sobhavacher dag ghaltat, nhesnnam gheit ravta tednam, tuka duddvanchem mol kollonam. Hi nhesnnachi as tuka goribanchea uskeantlo pois kaddchinam mu?
Thoddeank amkam jevnnachi chodd as. Sadem upkaronam, borem-borem jevunk zai. Tem bholaikek borem vo vaitt tem ani pollevop nam. Aili ruch, bhorlo buch. Borem tem ami vinchun khatat, ani urlolem-sorlolem dusreank dovortat. Mosmoxit-ruchichem tench amkam zai. Koddu, oinni, ruch naslolem amche bholaikek kitlench faideachem zaum, tem mat amkam borem lagonam. Jevnnachi ani odik korun amche bholaikek mal poddtat tea jevnnachi as amchi bholaiki piddek pavoitoli, hi tuka khobor asa?
Thoddeank motoranchi chodd as. Nhesnnam bodoltat toxim motoram bodoltat. Zaiteank ‘garage’ bandunk zago nam, pavsant-gimant motoram bhairuch astat. Aiz motorsaikol, magir ‘Maruti’, tea uprant ‘Scorpio car’. Thodde ‘show’ marunk tim motoram ghetat, thodde apleak tank asa mhonn dakhovnk ghetat, thodde dusreank challounk him motoram ghetat. Vhoddleam motorank ‘parking space’ mellonam, torui vhoddlich zai. Vhoddlim ghetlim mhonn zaina, taka magir ‘petrol’ vo ‘diesel’ ani ‘maintenance’ asa hem khoim tankam poddlam? Yedem vhoddlem motor ani choloitolo yedo-so. Ghorant mon’xam poros motoram subez zaleant. Rosteanche koxe hal zatat, ‘pollution’ kiteak vaddta, ‘traffic problem’ kednam zata, hacher kednam tori ami chintlam? Mon’xa tuji axa vaddot asa, tacho porinnam’ kitem zatolo? Zomnichi, duddu-girestkayechi, vhoddponnachi, nhesnnachi, jevnnachi, motoranchi ani her sonvsari vostunchi axa korit ravxi ani tujem jivit doxek pavoixi!

Nevel Vell'lekar
________________