Postt Ofisacho fuddar kitem?
Bharotant 1,55,618 postt-ofisam (ttopal kochereo) asat. Hea ofisamni 5,66,000 lok nokri korta. Haka lagun, puray sonvsarant ani Bharotant postt ofisachem vhoddlem vavra-zallem (network) asa.
1774 vorsa Abrilache Poiler poilech pavtt Bharotant posttacheo sovloteo Bengal, Mumbai ani Madras, ani tea uprant her-ui rajyamni suru keleo. Tednam thavn postt-ofisam Bharotachea soglea nagrikank gorje khatir chittintlean vevhar korunk chodduch faideachim zalim. Bharot sorkarachea Ministry of Communi-cations and Information Technology hache khal Ttopal Khatean itlo kall, nagrikanchi satvikponnan ani visvaxiponnan seva korit panvlam mukhar ghaleant. Punn aiz, Information Technology itli fuddem pavlea, ki internet ani mobail fonachi Short Message Service (SMS) hachi sovlot mellta dekun posttache sevek ani kamak khuim tori mar bosla oxem dista.
Punn Moddganvchea Mukhel Postt Ofisacho Mukheli Xri R. L. Prabhuk mat toxem disona.
“Toxem pollevnk gelear, internet, SMS heo seva yeun amchem kam' khub sompem zalam. Atam lokak don volli borovn goroz tea mon’xak kitem-i kollovpachem aslear postt-karddam viktim ghevpachi goroz. SMS, e-mail kelo ki ghoddie bhitor khobor dusrea pontak pavta.” Internet, SMS he Mahite Teknolojiche adhunik upay boreach probhavikponnan choltat. Zalear, posttache seventlean nagrikanchi goroz pallpi Posttachea Khatean hea avhanak vella ani kalla pormannem tondd dilelem dista. Xri Prabhuche sangnne pormannem, “atam amchi e-post seva lokak mellta. Adim lokak telegram dhaddunk voranchim voram vollint ubem ravchem poddtalem. Atam ghoddie bhitor e-post-antlean sondex dusrea zagear pavta, uprant to xaramni vo ganvgirea vattaramni zaum”.
Bharotache svotontrtaye vellar 23,344 postt ofisam aslim tantuntlim 4,160 xaramni ani 19,184 ganvgirea vattaramni aslim. Atam desant 1.55 lakh postt ofisam asat tantlim 16,259 xaramni zalear, 1,39,074 ganvamni asat. Rajya-rajyachea khuinchea-i konnxak aslolo nagrik aiz adhunik Mahiti Teknolojicho vapor korun aplo vavr sompo korunk sodta tachi sulus ghevn Bharoti Posttan speed post, epayment, logistics post, e-post, Business Post, Media Post, Direct Post, Postal Life Insurance, Instant Money Order Service (IMO), International Money Transfer osleo, kallak sobtat tosleo yeuzonno chalik lavn nagrikancho apleavelo visvas rakhun ani samballun dovorla.
Nagrikank azun-ui posttacher visvas asa dekun, tancheo gorzo sompeponnan bagovnk heo yeuzonno amkam chalik lavcheo poddleat, oxem Xri Prabhun sanglem. “Atam ghorant internet-achi sovlot asa taka lagun pordesant ghovak chitt borovpachi gorozuch upra-sona”, oxem Moddganvchea, Rawan-fondd vattarant ravpi Maria Gomes-an sanglem.
“Ratchea vellar internet-ar ami on line astanv. Hantuntlean, chittintlean vicharunk ani sangunk zainant titleo gozali amkam vicharunk, sangunk ani zanna zavnk melltat,” oxem Xmt Gomes-an fuddem sanglem. Adlea vorsamni porde-santleo khub chitti yetaleo- vetaleo tancher atam boroch probhav zala mhunn posttache odhikari mandun ghetat taka hea sangnneachi ghottsann mellta.
“E-mail, SMS heo sovloteo aichea kallar amkam tornnateank favo zavnk ami khorench noxibvont mhonnonk zai. Hea probhavik sovlotink lagun, aiz porian mhaka ganchea posttache panvdde choddpachi goroz poddunk na,” oxem Aldonchea 20 vorsam pirayechea Steven Bramblee hea tornnatean sanglem. Mahiti Teknolojin voilea gozalim udexim somazant zorui teknolojichi kranti ghoddoili, torui he probhavik krantik lagun Bharotantlea postt ofisancher far aila mhonnunk zavchem na. Karonn, kalla pormannem matheak kurponnem ghevn fuddem vochpachi tank, 1774 vorsa thavn nagrikanchi seva korpi Postt Khatean dakoilea ani azun-ui dakoit asa.
No comments:
Post a Comment