Udorgot kortelea xikxonnachi goroz

Vachpi Boroitat

Udorgot kortelea xikxonnachi goroz

Junache 20vechea V. Ixtt-ar Tomazinho bab Cardozan “Amchem Xikxonn Amcho Fuddar” hea vixoyacher lekh boroila to khup avoddlo. Bhurgeank iskolamni ditat tem xikxonn tanchea jivitachi udorgot zata toslem zavnk zai. Udorgot vo sudarop zaina toslem xikop faideachem nhoi. Tomazinho baban sanglam tem khorench gorjechem. ‘Value Education’ bhurgeachea jivitak zai. Pustokanch artilim-portilim mhonnlear zaina. Gaddva porim bhurgim pustokancho sak khandar ghalun iskolak vetat punn jivitant gorjechem tem ‘valule education’ bhurgeam thaim disti poddona. Somazant koxem jiyeunchem, zannteam thaim koxem vagchem hem tankam kollona zalear tim ghetat tem xikxonn nirfoll.
Tomazinho babak xikxonnacho khup onnbhov asa, tannem osleach vixoyancher zannvayeche lekh boroilear amkam khup faideak poddtolem.
Denzil Rocha, Dicarpale

Gõyank arthik mozot

Amcho Dokxinn Gõycho Khasdar Sardinha Gõy khaxelem Rajyo korpak ani Gõychem sabar vattamni sudarop korcheak Kendr Sorkaracho adar magunk sodta mhonn ami khoxal. Hem kam’ kortana khasdaran monant dhorunk zai ki Gõychea sorkaran azun ‘Sixth Pay Commission’ haddunk na. Her kamdar hantuntlean favo zavpi sovloteo ghevnk lagleat. Herank mellta zalear dusreank kiteak mellona, ho vegllozar kiteak? Dusri gozal, Kendr Sorkara koddche duddu haddtat tancho Gõyant koso upyog zata tacher Sardinh baban lokx ghalear borem. Kamdarank ‘Sixth Pay Commission’-acheo sovloteo mellcheo mhonn ami vinonti kortanv.
A.Gomes, Bannavle

‘Apna Ghor’-antlim bhurgim pollun vetat

Halinchea disamni ‘Apna Ghor’-ant aslelim bhurgim pollun vetat mhonn khobro yetat. Ho ek gombhir proxn mhonnlear zata. Jivitachea proxmamni aslolim mhonnlear xindullki dhondeantlim bhurgim thoim haddun dovortat. Punn tim dhados nant. Kiteak oxem ghoddta tem pollevnk zai. Vaitt ogunnank sampoddlelea bhurgeank maye-mog zai. Tankam doya-maya dakovn tanchem punorvosonn korunk zai. Tim babddim konnachea davlak sampddun gulamam zavnk pavtat. Tanche thaim moipas ani mogall vagnnuk dakovnk zai. Dekun ‘Apna Ghor’ choloitolea karbhareamni hacher lokx ghalunk goroz. Toslea ghoramni vavurtoleank avoyponnachem kalliz asunk goroz. Duddvanche axecho vavr zavnk favona. Aplinch bhurgim zal'le porim vagounk chodd gorjechem. Tednach ‘Apna Ghor’ mhonntat tem khoreinch aplem ghor mhonn tim mandun ghetolim ani pollun vochunk pavchim nant.
Maria Almeida, Moddganv.

Gõyant 2 lakham voir bekar

Gõyant do lakh odik lok bekar asat mhonn aikun vhoddlea uskeachi gozal. Sorkaran her yeuzonneo korche poilem Gõyantlem bekarponn pois korpak nokreo utpon’n korpachim panvlam ubarunk goroz asa. Poryavoronnak vaitt zaina tosle udyog suru korunk sorkaran proyotn korche, Iskolamni bhurgeank teknikal ani xetkamot xikovpache vixoy aslear borem. Atam meren Gõyant toyar zatat te kocherimni vavurpache karkun. Punn karkunacheo nokreo itleo asona zavn bekareancho ankddo dor vorsa vaddot veta. Karkhanneamni goroz tosle vavraddi toyar asunk zai, tednach bekareancho ankddo denvtolo.
Leo Fernandes, Vasku

Kochreachem sarem faideachem

Fattle pavtt tumi kochrea vixim ogrlekh boroila to ami ruchin vachlo. Tumi mhonntat tem khorem. Verna Agnel Education Komplexant kochreachem sarem korpachi yeuzonn chalik lailea toxi heramni kel’li zalear bhov faidea-chem zatolem aslem ani kochreacho proxn suttavo zait aslo. Hache vixim lokak zannvikay divchi poddtoli ani lokacho-i he yeuzonnek tenko gorjecho. Sodanch kochreachich khobor aikun vaz aili. Hem kam’ korunk konnem-i tori fuddem sorchem.
Sebastiao Fernandes, Anjuna.