Friday, April 10, 2009

Bhoktivont Juze Vaz misionarank nomuno

Bhoktivont Juze Vaz misionarank nomuno

“Tumi mhoji khobor ghevnk konn? Hanv tumcho soiro nhoi. Hem tumkam sobona. Mon bodolpacho ho tumcho vavr” oxem Bambolleche GMC-int duentik bhett ditana khattir aslolea eka bhavan mhaka soroll sanglem. Hanv, Vhoddlea Gõyche firgojent Gonvllik onnbhov ghetana, dor brestarak GMC-int duentik bhett kortalom. “Koxe asat tumi?” hea mhojea prosnak 'tea' hindu bhavan ragan ani khattivelo utthunk yotn korun dil'lo zobab mhaka tor khup chintunk boll korunk laglo. Aiz ,ami kristanvamni dhorm, zat ani her kosloch bhed-bhav maninastana dil'li seva kitli meren manun ghetanv?Ani ghena zalear kiteak? Soglleank ekuch mapan vo nodren pollevop sarkem?
Amchea Bharotant ani khas korun Gõyant adim sakun videxi misionaramni sabar toren vavr kelo. Tanchea vavracho boro-vaitt porinnam’ aiz ami bhogtanv zait, punn aiche poristhitint tancho boro vavr ami apnnavchi goroz. Tanchech sfurthen amchea Bharotant-ui vhodd misionar toyar zale. Dekhik, St. Gonzalo Garcia, Bhoktivont Juze Vaz, Sant Alphonsa ani Devacho Sevok Martir Devasahayam Pillai.
Gõy-Damanvchi Povitr Sobha Janerache 16ver aplo Askari, Bhoktivont Juze Vazachi dobajik porob somarombhta. He porbe somoyar, tancho dhorm-porgottnnecho vavr sufoll zavnk tannem apnnailolea gunnachi vollokh ghevn tanche koddlean ami sorv dhorm-porgottnnaramni thoddem tori xiklear borem dispachem. Bhoktivont Juze Vazachea jivitant dhorm-porgottnnek favo tosle sabar gunn dixtti poddtale.
1) Magnneanchem jivit: Juze Vaz Jezucho niz pattlavdar koso jiyelo. Khoinchea-i vavrak hat ghalche poilim aplo vell to Jezuxim bosun sartalo. Ek misionar mhonntoch lokanche sevek tacho puray dis vetalo torui astana magnneanchea jivitak to sodanch visvaxi ravlo. To magnnem korunk ietalo tednam Kutt'tthalleche firgojechem dar apo-ap ugoddtalem oxem itihas sangta. He vorvim Jezu kodde laginch som’bond zoddun tannim her gunn apnnaile. Porom' Sonvskarachi bhokti tankam khup.
2)Moriyechi bhokti:
Taka Moriechi khup bhokti asli. Tannem boroilole eke chitti vorvim aplem purai jivit tannem Moriek somarponn kelem. He vorvim Moriecho khalti sevok zalo.
3)Sadem Jivit: To choddso lovkikam vangdda aplo dhorm-porgottnnecho vavr kortalo. Kanarantlea ani Sri Lankentlea tea gorib lokachi poristhiti vollkhun tanche porim to jiyelo ani tanche sonvskruti pormannem Jezu tankam dilo.
4)Lhanvikayecho sagor:
Bhoktivont Juze Vazak dhorm-porgottunk Sri Lankek vochunk zai aslem, punn tachea vhoddilamni taka porvangi divnk na ani Kanarant te kottinn poristhitik fuddo korunk dhaddlo. Khuxe monan tannem aplea vhoddilam sovem Devachi khuxi polleli ani aplo vavr sufollayen sompoilo.
5)Jezuk porgottchi urba:
Jezu dusreank porgottunk zai aslo dekunuch tannem jivitant ietolea koxttam-addkhollink Jezucheach adaran fuddo kelo. Sri Lankent toxench Kanarant taka koxtt dhumallo asloch. Hea koxttam vellar Jezun taka sangat dilo. Tea kallavele poristhitik lagun tannem ganv soddun vochun dusrea ganvamni lokank atmik ani her adar dilo. Pedo, kuli, poder, chakor oxe sabar bhes ghevn tannem Jezuk porgottlo. Amchea-i bhesa pormannem ami Jezuk porgottcho. Hem korunk Bhoktivont Juze Vaz amkam sfurti ani nomuno. Ami Jezuk porgott'tanv zalear amcho som’bond Jezu lagim mozbut korchi goroz. Halinch Orissant ani her rajyamni zal'le Kristanvancher akromonnam amchea jivitacher nodor marunk huskaitat. Juze Vaza bhaxen favo toslem jivit jiyeun Jezuk dusreank divnk ami pavlam marlear xanneponnachem .

John M. Alfonso

No comments: