DEV TARIT TAKA KONN MARIT?

Voparinchea Bhanddarantlem:

DEV TARIT TAKA KONN MARIT?

Kitlea zannank Bhoktivont Juze Vazachi khobor asa? To khoim zolmolo ani khoim melo to kitlim zanna zannant? To amcho Gõycho put bhagevontponnache vatter asa. Tachem chitr kitlea ghorabeamni asa. Tachea manak kitlim zanna novenachim magnnim kortat? Kitlim zann Sancoale pavleant? Amche modlim kitlim zannam Bhoktivont Juze Vazache vinovnnen magtat? Tache vinovnnen kitlim dennim mell'leant tannim sobhemazar porgott kelam?
21ver Abrilache, 1651 vorsa, Gõychea Saxtti talukentlea Ban’navle ganvant Juze Vaz zolmolo. Christopher Vaz ani Maria de Miranda hancho to tisro put, Aziecho vhodd dhorm porgottnnar zavnk pavlo. Ponchvis vorsanche pirayer, 1675 vorsa Monsignor Antonio Brandao, Gõycho Arsebisp hannim taka Adlea Gõyam padrichi sonvskarnni dili. 1681 vorsa, Marsachea mhoineant to Kanara gelo, ani thoimsor thavn to porot vollun pollevnk na. Vellacho faido kaddun, vadoll-moddancher zhuzun to ek vhodd misionar zalo. Ho tacho vavr kortana, taka dubavan dhorlo ani bondkhonnint ghalo, punn Juze Vazan Jezuchea moga khatir sogllem sonslem ani to Jezuchi bori khobor porgottit ravlo.
Ganvchi bhas xikun, veg-vegllo bhes korun to sompeponnim Seilanvank bhonvtalo. Tannem 'Oratory of the Cross of Miracles' ghoddun haddli ani ti Adlea Gõyam sthapun, tantuntlean misionari, Juze Vazan Sri Lankechi Povitr Sobha zagoili ani jivall keli.
Juze Vazak Saibinnicho kherituch mog aslolo. Padri zatoch tannem boroiloli. 'Letter of Bondage' hantum apunn khotavinn Mayecho chakor mhonn tannem porgott kelem.
To jiyelo tosoch to melo. Padr Juze Vaz ek uzvaddit divtti xant'tayen palovli. Hatant ek pettloli vat ghevn ani vonttamni Jezuchem nanv kaddun, sukraradis rati, 16ver Janerache, 1711 vorsak to somplo. 248 vorsam uprant, mhonnge 21ver Janerache 1995, Pap Saib Juanv Paulu II hannim Padr Juze Vazak 'Bhoktivont' mhonn pacharlo.
Padr Juze Vaz aplea bacheak Diakn Juze Vazak chittint oxem boroilolem. 'Zo konn amchem jivit uzvaddaita, to uzvadda modem uzvadd, bhagevonta modem bhagevont, khursar morun punorjivont zal'lo amcho Somi Jezu Krist to, tannim tujea kuddichea ani mornnachea dolleank tachea jivitachi vatt cholunk ani tachi xikovnn pallunk uzvadd divcho.’
Bhoktivont Juze Vazan torekvar bhes korun Jezuk porgottlo. Devan amkam torekvar gunn dileat. Tancho boro vapor korun ami Jezuk porgottum ieta. Zaiteank borovpacho gunn dila. Boroita-boroita Jezuchea jivitachi khobor korchi. Tannim amkam dil'li xikovnn dusreank-ui vanttchi. Zaiteank amkam ulovpacho xegunn dila. Uloita-uloita Jezun tujea jivitant kitem borem kelam tem-ui sangchem. Thoddeamni gitam rochun gavum ieta. Gitamni Jezucho sondex divcho, tiatrantlean Jezuchea mogacho prochar korcho. Koslea-i somarombhak Devachea utrantlean ruch vaddounchi. Khoimsor-ui ami asum, zaum ghorabeant, xezaream modem, vaddeant, kolejint, kocherint, vavrachea zagear, Jezuchi bori khobor porgottum ieta, lozchem nhoi, bhiyeunchem nhoi. Tujea jivitantlean zaitim Jezuk lagim yeum-di.
Bhoktivont Juze Vaz Bhagevont zavche vatter asa. Tache vinovnnen Deva lagim magum-ia. Ani maglolem melltoch tachi rokddich porgottnni korum-ia. Aiz Bhoktivont Juze Vazachem jivit iskuttaun ditolim pustokam melltat. Tim vachun Bhoktivont Juze Vazachem jivit ami zanna zavnk pavtoleanv. Prince Jacob hea Gõychea fankivont tiatristan, hea bhoktivont padrichea jivitacher ek tiatr boroilolo, atam to VCD-chea rupan uzvaddaila. Ti ghevchi, pollevchi, niyall korcho. Bhoktivont Juze Vazachem jivit amchea kristi jivitak sfurti zata. Hea Gõykar putak Gõycheoch put-dhuvo vollkhonant mhollear, hi ek lojechi gozal. Mellta tea sondeancho faido ghevn ami hea Gõychea vhodd putache vollkhin ani mogan vaddot vochum.
Dev tarit taka konn marit? Dev amchea sangatak asot zalear, dusmanachean kainch korunk zaina. Bhoktivont Juze Vazak zaiteo oddchonneo asleo, punn Dev tachea sangatak aslo, Povitr Atmo taka dhir ditalo, hech pasot to Jezuk govai divnk pavlo. Ami Jezuche bore khobreche porgottnnar zavn amchea jivitantlean Jezuk porgott'tana, amkam-i oddchonneo melltat. Devachea adaran fuddem chantt marum-ia. Bhoktivont Juze Vaza sorgincho mokutt favla toso amchea borea vavrachi goddiek amkam hea sonvsarant mozuri mellchina, punn jerul eka disak sorginchem sukh bhogunk pavtoleanv.


Nevel Vell’lekar
www.v-ixtt.com