Guruji tumche ami upkari

kovita



Guruji tumche ami upkari

Jednam pavs poddta,
Tednam sogllem novem kirlota,
Guruji tujea utramni,
Novea sonvsarachi dixea mellta.

Jednam suria udeta,
Tednam novim kirnnam porzolltat,
Guruji tujea utramni,
Monant vichar chokchoktat.

Jednam chondrim mollbar ieta,
Soglleak chan'nem ximpddaita,
Guruji tujim utram
Pavlank mhojea vatt dakoitat.

Ami vaitt rostean gelear,
Guruji tuji boddi poddta,
Punn tech tuje boddien,
Amcho novo sonvsar ubzota.

Bagent tumi zaitim zhaddam roilim,
Kaim zhaddam rosroxit vaddlim,
Thoddeank vallimni ghuspailim,
Guruji tumchea adaran tim ful'lim.

Aiz meren tumi amkam xikoitat,
Amchem ginean uzvaddaitat,
Pormollachim fulam fuloitat,
Tancho pormoll ami ximpddaitat.

Milton R.
________________________________________________________


Tum ani Hanv

Tum ravtai vhoddlea chokchokit rongit flettant
Ani hanv dakttuleach xennachea ani matiechea ghorant
Tum boro jevta-i jevonn masa-nusteachem
Mhaka mellona sanddlolem, nhoi mhonn uxtteachem.

Tum nheson bhonvtai, ghalun suttam-buttam
Hanv matr nhestam pinzlolim, lokan dilolim vostram.
Tum firtai adhunik, mottari-skuttoramni
Hanv choltam-bhonvtam, mhojea don-ui payamni.

Tum ratrichi “taka” kortai, polongar ghevn uxem
Mhojem uxem mhoje hat, mhoji khatt bontor xendrechem.
Tum viski-brenddi-voddka pivun, kortai vhoddlim festam
Mhaka toslo nhoi mhonn, fenniecho ghontt-ui mellna.

Tujea flettant udkacho noll, udok mellta zai toxem
Mhaka xezarchem bainchem, khandar marun ojem kollxeachem
Tuka sogllech kortat namaste-salam
Mhaka konn tokli-i voir kaddun pollena.

Tuje mitr rupem-bhangar-motiam aslole
Mhoje matr gorib, sanjek sarkem naslole.
Tuvem ani hanvem dhamptoch, ek dis amche dolle,
Dogaimk-ui tich zomnichi mati, toch uzo polle.

Diogo M. Fernandes