Pri Mathew Konknnicho Zannkar ani Sevok sorlo

Pri Mathew Konknnicho
Zannkar ani Sevok sorlo


Porvore:

Bhou fanki Konknnicho bhasxastri, ani boro xikoupi amcho ixtt Pri. Mathew Almeida Fevrerache 18ver ontorlo. Itle zannvaye-cho ani unchleo podveo zoddlolo Pri. Almeida sodanch lhanvikayecho chodd aikopi ani thoddench uloupi oslea sobhavacho aslo. Tachea mornna vorvim nhoich Jezuit Sonvsthek, bogor Gõykarank ani bhou korun Konknni bhaxek to unno zalo. Thomas Stephens Konknni Kendrant tacho zago rikamo zala to bhorun haddunk bhouch kottin zatolem. Pri. Mathew Almeida Kundapur, Kornattokant, Setembrache 29ver, 1935 vorsa zolmolo. Kundapur ani Kallianpur poilem xikop kelea uprant 1952 vorsa Julayache 12ver to Jezuit Sonvsthent bhitor sorlo. Marsache 24ver, 1965 vorsa De Nobili Siminarint padri zalo. Sitagarha tertianship keli.

Kornattokachea Vidyapittant, Dharwad tannem MA keli ani Mumboichea Vidyapittant M.Ed podvi zoddli. Uprant Washington xarant vochun Georgetown Vidyapittant M.S. ani bhasxastrachem unchlem xikop korun Ph.D podvi ghetli. Puneant tannem St. Vincent High Iskolant xikoilem ani Mhapxem St. Britto Iskolacho to Reitor aslo. Belgaum St.Paul iskolacho ani Junior Kolejicho, toxench Moddganvchea Loyola Iskolacho-i Prinsipal mhunn vavurlo. Uprant Miramar Loyola Hall-achem Vhoddilponn choloilem ani Thomas Stephen Konknni Kendr tachea vavrantlean sthapli. Porvore hem Kendr bandtana Pri. Mathew-an moladik vavr kelo. Zhaddam-peddam tannem laun dovorleant ani 1985 tem 2002 vorsamni to Kendracho direktor aslo. Kendrachem xon’sodhan nemallem “Sod” hacho to Sompadok aslo, Konknni bhaxeche sod korun to zannvayechim borovpam kortalo. Tannem 2006 vorsa ‘Dor Mhoineachi Rotti’ hatant ghetli. Tachea hatantlean 14 moladik ani unchlea dorjeachim pustokam uzvadda aileant.
Pri. Mathew sodanch Konknnichea mogan ani seven bhorlolo. Amkam omor ugddasachim pustokam: A Description of Konknni, Konknni Basic Course (Konknni Mullavo Kors Devnagrint), ani Romi Lipient Konknni Kors. Hem nim’nnem pustok Romi boroitoleank chodd mhotvachem. Konknni bhaxecho zannkar koso Gõy Sorkarachea, Kendr Sorkarachea zaitea somitimni, toxench Gõy Vidyapittant toxench her-ui somitimni to vavurla. Xikoupachem, pustokanchim kovram ‘designing’ korpachem ani Jezuitanche ‘logo’ korpachem kam’ to kortalo. Soglleamni Konknni bhas ghorant ulounchi mhunn to mona-kallzantlean distalem. ‘Institute of Menezes Braganca’-cho taka “fellow” ho manacho ‘title’ dil’lo. Goa Konknni Akademicho taka ‘Sahit’ya Pradnya Puroskar’ favlo. Konknniche Romi lipintlean to sobdkox toyar kortalo, to vavr atam opurnn urla.

Tachea mornnachi vidi Porvore Povitr Ghorabeache Igorjent zali. Arsebisp Filipe Neri Ferrao mukhel iadnik asun Sangatim Mis bhettoilem. Jezuit padri ani Pilarche Sonvstheche padri hajir asle. Misachea xevottak Pri. Pratap Naik-an Pri. Almeidachea mornnan apleak zalolem kallzachem vhodd dukh ugtailem. Tachea mornnan aple hat lunne kele mhonn sanglem. Kendrant vavurtoleamni dukham golloun Pri. Almeidachem jivit iskuttailem; mondirantli “Nanda-deep” koxi Kendrant astali mhonn eklen sanglem. Pri. Vasco Regon provochon kelem, zalear Padr Vigar Anand Pais-an ximiterint nimannim magnnim kelim.