"Hanv Taka vollkhoch nam!" ...Prachit kallantli dakhounn

"Hanv Taka vollkhoch nam!"

...Prachit kallantli dakhounn

Vell'lekar Nirmiti hacho 34vo Konknni tiatr ani prachit kallantli 13vi dakounn 'Hanv Taka Vollkhoch Nam!' hea korezmant machier yeunchi asa. Tachi ugtavnni Gobrachea Budhvaradis, 25ver Fevrer, 2009 Usgao Igorje lagim zali. Pri. Nevel L.S. Gracias-an to boroun digdorxit kela. Tiatracho vinodi bhag ani sogllim gitam ani kant tannench rochleat. He dakounnent Gõyche fankivont kolakar Antonette de Calangute, Jessica Gomes, Comedian Domnic, Luis Bachan, Salu de Loutolim, Rupesh Jogle ani Nevel Vell'lekar bhag ghetat. He dakounnek songit Mestri Agnelo Dias-an (Trumpet) boroilam. Mestre Minguel Rodrigues (Saxophone) James Vaz (Keyboard) Jeffrey D'Souza (Bass Guitar) ani Xavier de Moira (Drums) songitant sangat ditat. Tony Vaz machiechi manddavoll korta ani John Marques bizlechi vevostha polleta. Hi dakounn panch bhagamni boroilea ani dor ek bhag Povitr Pustokantlea dekhaveantlean suru zata. Vixoi-Git Bhagevont Pedrun ucharlolea utrancher 'Hanv Taka Vollkhoch Nam!' hacher attaplolem asa. Sogllim gitam vixoyacheruch ani monis som’b-ondacheruch boroileant. Sadi Konknni punn khup mhonn'nneo vapurleat. Hea prachit kallant ogle-unne ponche-challis (45) proyog Gõychea char-ui konxeamni zaunche asat. Tachi mukhel kotha mon'xachea som’bondacher, monis apli goroz zatoch dusreak vollkhona ani apsvarthan jiyeta hacher attaploli asa.
Pri. Nevel Gracias haka 17ver Abrilache 2009 vorsak Kala Academy-n Boroupi mhonn Tiatr Disa bhouman kelo. Tannem sumar don’xim Konknni nattkulim boroileant ani tin'xim odikuch kantaram rochleant. Halinch tannem 'Tim Sogllim Ek Zaum' VCD uzvaddailea, ani taka zaiteanchi xabaski favlea. Tachem sat ek-anki nattkuleanchem pustok 'Ho Sonvsar Ek Machi' uzvadda ailam. Halinch Harmonizers Utordechea pongddak 'Mando Festival'-ant poilem inam’ favlam to manddo Pri. Graciasacho aslo.. 'Vavraddeancho Ixtt Writer of the Year 2008' ho Pri. Lactancio Almeida Puroskar taka mell'la. Nigtech ghoddun haddlole 'Tiatr Academy'che Vavurpi Somiticho to vangddi asa. 'Jivit,' 'Dor Mhoineachi Rotti, ‘Sobdacho Prokas,’ ‘Jivitacho Prokas’ ani ‘Amcho Sevadhorm’ hacher to boroita. Hea amchea sangati boroupeak ami sogllem borem anvddetanv ani Konknni machievelean ani boroupantlean Jezucho nirop porgottunk bori bholaiki magtanv.