Tiatrachea Machier

‘Ami Chuklim'
vhoddilank xiddkavnni



Bhurgeanche khuxe add avoi-bapui veta tednam tanchea jivitant kitem ghoddta ani tacho porinnam’ koso zata tem Ami Chuklim hea Prince Jacobachea tiatrant pollevnk mellta. Sasha (Annie Quadros) ani Trevor (Bernard) hancho gupit mog korta, punn dogaincho bapui tanchea mogacher add vetat. Sashacho bapui, Captain D'Souza (Jacinto) foujentlea aplea eka ixttachea cheddea lagim tachem logn tharaita, zalear dusre vatten Trevoracho bapui, Joe Rose taka eka onath cheddva, Belinda (Cookie Pires) thaim kazar korta. Lognacho sakrament zoddlolo astona-i Sasha ani Trevor eka-mekak guptim bhettun, sodamkal visvaxi ravn, aplea vhoddilank ek lisanv xikovnk chintat.
Tanchea nennarponnak lagon, Sasha ani Trevor toslo nirnnoi aplea jivitant ghetat. Zorui Sashacho ghorkar, Captain Alvito Rodrigues (Simon) aple potinicho mog axeta, Sasha taka pois dovorta ani goroz poddlear zobordosten to sangta tem aikota. Dusre vatten, Trevor aple potini, Belindak kikont korta ani apunn fokot Sashacho mog korta mhonn taka spoxtt korta.
Captain Alvito Rodrigues aple potini Sasha udexim logni jivitant niraxiponn onnbhovta tednam, porot ek xipai koso ximer vochun dusmanachea hatantlean morunk toyar zata. Tednam, Sasha taka addaunk proyotn korta ani apunn tachea bhurgeachi avoi zaunchi asa mhonn khobor dita. Ti khobor aikhun Captain Rodrigues khup khoxal zata ani aplo nirnnoi bodolta. Ek dis Trevoracho fon ieta tednam taka mud'dom bhettunk Captain Rodrigues Sashak provangi dita ani tancho mog atam povitr dovrunk adar korta.
Sasha Trevorak bhett'ta tednam fokot eka ixttinnichea natean tem taka polleta ani vagta. Punn Sasha vixim aplem mon bodlunk Trevor kosoch kobul na. Logni jivitant 'compromise' aslear sogllem tharear poddum ieta ani toxem ghoddun yeunk eke ostorecher dhorlolem asa mhonn Sasha Trevorak somzaita. Belindak apleachi potin mhonn mandun ghevn, tika visvaxi ravnk Sasha Trevorak adar korta. Sashacho ani Trevoracho bapui apli chuk vollkhun gheta Sodanche porim, Annie, Diana ani Cookie ap-ali bhumika bore toren kortat. Reagan ani Bernard ap-aple porim bhumikent porzolltat. Komeddi babtint Prince Jacob ani tacho bhav, Rambo (Humbert) sodanche bhaxen ap-aple bhumikent porzolltat. Machiechi ani bizlechi manddavoll bori asa. S Lemos-an gailolem 'Vavracho valor,' ani Jacob-Humbertachem duet 'Sardar' lokak avoddlem. Reaganachem kantar, 'Xezareacho mog,' Jose Rose-achem 'Old is gold' ani Humbert, Reagan ani Jacob-achem trio kantar, 'Kristanvank dhumallo' aikopa sarkim aslim.

Digdorspi uloita:

* 1985 vorsa 'Pinzrem' tiatr machier haddun, ek ‘professional' tiatrist koso Konknni machier ailom.
* Ho mhozo 47-vo tiatr ani somajik vixoyancher tiatr
Borovnk mhaka chodd umed.
* Novea, tornnea kolakarank mhojea tiatrant ghevn, tiatr machi girest korunk mhoji itsa.
* Romi lipik maneotai mellunk soglleamni pott’tiddken vaurunk goroz asa. Soglle suvater Konknnicho vapor zavpachi goroz asa, na tor fuddle pillga fokot 'English'-a fattlean dhanvteli.
* Konknni bhas samballunk ulo marlear, soglleamni aplo tenko divcho.
* 'Work is worship.' Ek tiatrist koso hanvem mhozo sonvsar kelo ani mhozo ghorabo choloilo ani tiatra vorvim ozun choloit asam. Dusreamni toxench korchem. Teag, koxtti vavr korun, tiatrant vantto ghevn voir sorchem ani porzollchem.
* Tiatr Akademicho hanv ek vangddi. Te Akademi udexim tiatrachim pustokamn chhapun yeunk goroz. Tiatranchem ‘documentation' zavnk zai. Noveo yeuzonno uzvaddak yeuncheo. Tednach teAkademicho boro foll tiatristank ani dusreank melltolo.